वीरगंज । नेपाली कांग्रेस पर्सा क्षेत्र नं. १ का उम्मेदवार अनिल रुङटाले वीरगंज महानगरपालिका–१२ मुर्लीमा स्थानीय ज्येष्ठ नागरिकहरूसँग भेटघाट तथा अन्तरक्रिया कार्यक्रम सम्पन्न गरेका छन्।
कार्यक्रममा आगामी निर्वाचन, क्षेत्रको समग्र विकास, सामाजिक सद्भाव मजबुत बनाउने उपाय तथा संगठन सुदृढीकरणका विषयमा खुला छलफल गरिएको थियो। सहभागी बुजुर्गहरूले क्षेत्रले भोगिरहेका समस्या, आवश्यक पूर्वाधार र जनअपेक्षाबारे आफ्ना धारणा राख्दै नेपाली कांग्रेसप्रति विश्वास र समर्थन व्यक्त गरे।
उम्मेदवार रुङटाले स्थानीयवासीबाट प्राप्त सुझावलाई प्राथमिकताका साथ लिने प्रतिबद्धता जनाउँदै जनताको आवश्यकता र चाहनाअनुसार काम गर्ने दृढ संकल्प व्यक्त गरे। उनले निरन्तर संवाद, सहकार्य र आपसी एकतामार्फत मात्रै दिगो विकास सम्भव हुने उल्लेख गरे।
भेटघाटका क्रममा देखिएको सक्रिय सहभागिता, उत्साह र सकारात्मक सुझावले चुनावी अभियानलाई थप मजबुत बनाएको नेपाली कांग्रेसका स्थानीय नेताहरूले बताएका छन्।
संगठनभित्रको एकता र जनसहभागितालाई आगामी निर्वाचनमा सफलता हासिल गर्ने आधारका रूपमा हेरिएको छ। भेटघाटमा नेपाली कांग्रेसका जिल्ला सचिव इम्तियाज आलम क्षेत्रीय सभापति अरविन्द गुप्ता लगायतका नेता कार्यकर्ताहरुको सहभागिता रहेको थियो ।
तपाईको प्रतिक्रिया