वीरगञ्ज । थारु समुदायको हक, अधिकार, भाषा, संस्कृति र मौलिक पहिचानको संरक्षण तथा सामाजिक उत्थान गर्ने उद्देश्यले ‘थारु जागरण अभियान नेपाल’ स्थापना गरिएको छ।
अभियानको समुद्घाटन कार्यक्रम शनिबार वीरगञ्जको आदर्शनगरमा सम्पन्न भएको हो।
समुद्घाटन कार्यक्रममा थारु समुदायका अगुवा, समाजसेवी, बुद्धिजीवी, चिकित्सक, शिक्षक, पत्रकार तथा राजनीतिक दलका प्रतिनिधिहरूको सहभागिता रहेको थियो।

कार्यक्रममा वक्ताहरूले थारु समुदायको शैक्षिक, सामाजिक, आर्थिक तथा राजनीतिक सशक्तीकरणका लागि एकता र संगठित प्रयास आवश्यक रहेको बताए।
उनीहरूले भाषा, संस्कृति र परम्पराको संरक्षणसँगै नयाँ पुस्तालाई आफ्नो पहिचानप्रति सचेत बनाउनुपर्नेमा जोड दिए।
सोही अवसरमा स्वास्थ्य, शिक्षा, सामाजिक सेवा तथा पत्रकारितामार्फत समुदायमा योगदान पुर्याएका ११ जनालाई दोसल्ला र सम्मानपत्र प्रदान गरी सम्मान गरिएको थियो।
सम्मानित हुनेमा चिकित्सकद्वय डा. सुरेन्द्र चौधरी र डा. निरज चौधरी, प्रधानाध्यापकद्वय शिवनाथ चौधरी र रामशंकर चौधरी, व्रजकिशोर चौधरी, पर्सा जिल्ला बिकास समितिका पूर्व उपसभापति जोखन दास थारु, श्यामसुन्दर प्रसाद दास थारु, ललन कुमार दास थारु, शेष चौधरी, थारु पत्रकार सं पर्साका पूर्व अध्यक्ष शम्भु महतो र सञ्जय चौधरी ,शिवनाथ चौधरी ,रामशंकर चौधरी रहेका छन्।
कार्यक्रममा अभियानका अध्यक्ष मोहनलाल चौधरीले यसलाई कुनै राजनीतिक दल वा समूहमा सीमित नराखी समग्र थारु समुदायको साझा अभियानका रूपमा अघि बढाउने प्रतिबद्धता व्यक्त गरे।
अभियानले आगामी दिनमा थारु समुदायको अधिकार, पहिचान, शिक्षा, स्वास्थ्य, महिला सशक्तीकरण तथा भाषा र संस्कृतिको संरक्षणका क्षेत्रमा सामूहिक पहल गर्ने जनाएको छ।
राष्ट्रिय अनुसन्धान विभागका पूर्वप्रमुख हरिबबाबु चौधरी प्रमुख अतिथिका रूपमा उपस्थित थिए।
त्यसैगरी, कार्यक्रममा प्रदेश सभाका सदस्य देवनारायण चौधरी ,देवी चौधरी, डा. कृपा सिन्धु चौधरी, अधिवक्ता इन्द्रदेव प्रसाद चौधरी, पत्रकार शम्भु चौधरी, सञ्जय चौधरीलगायत विशिष्ट अतिथि, थारु समाजका अगुवा तथा विभिन्न क्षेत्रका प्रतिष्ठित व्यक्तित्वहरूको उपस्थिति रहेको थियो।
तपाईको प्रतिक्रिया