वीरगन्ज । जनता समाजवादी पार्टी नेपालका राष्ट्रिय अध्यक्ष उपेन्द्र यादवले संविधान संशोधन वा पुनर्लेखन नगरिए वर्तमान संविधान च्यातेर नयाँ संविधान जारी गरिने चेतावनी दिएका छन्।
मंगलबार वीरगन्जमा आयोजित जनप्रदर्शन तथा विरोधसभालाई सम्बोधन गर्दै उनले मधेसी, जनजाति र अल्पसंख्यक समुदाय विरोधी भएको भन्दै संविधानको पुनर्लेखन अपरिहार्य रहेको बताए। उनले फागुन २१ को निर्वाचनअघि नै संविधान संशोधन वा पुनर्लेखन हुनुपर्ने जसपा नेपालको माग रहेको स्पष्ट पारे।
अध्यक्ष यादवले सरकार र जेनजी प्रतिनिधिबीच भएको १० बुँदे सम्झौता चुनावअघि कार्यान्वयन हुनुपर्ने माग गर्दै हालको सरकारले जेनजी पुस्तालाई धोखा दिइरहेको आरोप लगाए।

मधेस आन्दोलनबाट प्राप्त संघीयता र लोकतान्त्रिक उपलब्धि मास्ने षड्यन्त्र भइरहेको दाबी गर्दै उनले ती उपलब्धि रक्षाका लागि जसपा नेपाल निर्वाचनमा सहभागी हुन लागेको बताए।
उनले विगत ३५ वर्षदेखि शासनसत्तामा रहेका कांग्रेस र कम्युनिष्टकै कारण देश भ्रष्टाचार, बेरोजगारी र आर्थिक संकटमा फसेको आरोप लगाउँदै आगामी निर्वाचनमा जनताले ती दललाई अस्वीकार गर्नुपर्ने धारणा व्यक्त गरे।
तपाईको प्रतिक्रिया