वीरगञ्ज। राष्ट्रिय स्वतन्त्र पार्टीका पर्सा जिल्ला सभापति हरि पन्तले  प्रतिनिधिसभा सदस्यमा आफु लगायत चारै क्षेत्रमा रास्वपाका उम्मेदवारहरु विजय  भए पछि एक धन्यवाद एबम शुभकामना सन्देश जारी गर्दै मतदाता, शुभचिन्तक र पार्टी कार्यकर्ताप्रति हार्दिक आभार प्रकट गरेका छन् ।

पन्तले आफूसँगै जिल्लाका  चारै निर्वाचन क्षेत्रबाट रास्वपाका उम्मेदवारहरूको विजयलाई परिवर्तनको लहरको रूपमा व्याख्या गर्दै देशमा भ्रष्टाचार र कुशासन अन्त्य गर्ने प्रतिबद्धता समेत व्यक्त गरेका छन् ।

 सन्देशमा पन्तले भनेका छन्, “पर्सा निर्वाचन क्षेत्र नम्बर १ को प्रतिनिधिसभा सदस्य पदमा आफू सहित जिल्लाका चारै क्षेत्रबाट  राष्ट्रिय स्वतन्त्र पार्टीका उम्मेदवारहरूलाई निर्वाचित गराउनु भएका सम्पूर्ण जिल्लावासी, मतदाता, शुभेच्छुक, राष्ट्रिय स्वतन्त्र पार्टीका नेता, कार्यकर्ता तथा साथीहरू र परिवारका सदस्यहरू प्रति हार्दिक आभार प्रकट गर्दछु ।”

उनले मतदाताहरूको साथ, , सहयोग र मार्गदर्शनले नेपालभरि परिवर्तनको लहर आएको दाबी समेत गरेका छन् । “तपाईँहरूको साथ, सहयोग र मार्गदर्शनले आज हामीले देशै भरि परिवर्तनको लहर ल्याउन सफल भएका छौँ,” उनले उल्लेख गरेका छन् ।

पन्तका अनुसार, आगामी दिनहरूमा उनीसँगै पर्साका चारै क्षेत्रबाट निर्वाचित प्रतिनिधिसभा सदस्यहरू परिवर्तनलाई संस्थागत गर्दै भ्रष्टाचार, बेथिति र कुशासनलाई अन्त्य गरी विधिको शासन स्थापना गर्ने जिम्मेवारी रहने छ ।

उनले देशलाई प्रगतिको बाटोमा लैजाने आफूहरूको यात्रामा सबैको निरन्तर सुझाव, सल्लाह, माया र आशीर्वादको आवश्यकता रहने बताएका छन् । “यस यात्रामा सहकार्य गर्नुहुने तपाईँ सबैको निरन्तर सुझाव, सल्लाह, माया र आशीर्वादको मलाई आवश्यकता रहनेछ,” उनले सन्देशमा उल्लेख गरेका छन् ।

पर्सा जिल्लामा रहेको चार वटै क्षेत्रमा रास्वपाका उम्मेदवारहरू विजयी भएका छन् । पर्सा – १ मा पन्त निर्वाचित भएका छन् भने पर्सा – २ मा रास्वपाकै उम्मेदवार सुशील कुमार कानु, पर्सा – ३ मा पनि रास्वपाका रमाकान्त चौरसिया र पर्सा – ४ मा रास्वपाका टेक बहादुर शाक्य  निर्वाचित भएका छन् ।

समानुपातिक तर्फ पनि पर्सामा रास्वपानै पहिलो पार्टी बनेको छ । रास्वपाका उम्मेदवारहरूले पर्सा जिल्लामा उल्लेखनीय सफलता हासिल गरेको निर्वाचनलाई राजनीतिक विश्लेषकहरूले परिवर्तनको सङ्केतको रूपमा हेरेका छन् ।

उनीहरूको विजयले स्थानीय स्तरमा पार्टीको प्रभाव विस्तार गरेको छ भने राष्ट्रिय स्तरमा भ्रष्टाचार विरोधी अभियानलाई बल पुर्‍याउने अपेक्षा गरिएको छ ।

पार्टीका अन्य नेताहरूले पनि पन्तको सन्देशलाई समर्थन गर्दै आगामी कार्य योजनामा एकजुट हुने बताएका छन् ।