वीरगन्ज, ४ माघ । वीरगन्ज राजधानी संघर्ष समितिले आज आह्वान गरेको बन्दले जनजीवन प्रभावित भएको छ । बन्दकर्ताहरुले बिहानैदेखि वीरगन्जको विभिन्न चोक चोकमा टायर बालेर प्रदर्शन गरेका छन् ।

सरकारले प्रदेशको अस्थायी मुकाम जनकपुरलाई तोको विरोधमा आज वीरगन्ज बन्दको आह्वान गरेको हो । वीरगन्जको बाईपास, मुर्ली, बसपार्क लगायतका स्थानमा युवा नेता महमुद अन्सारी र अकलेश साहको नेतृत्वमा बन्दकर्ताहरुले टायरबालेर प्रदर्शन गरेका छन् ।

यस्तै बन्दकर्ताहरुले बिहिबार  बिहान दुईवटा गाडीमा समेत तोडफोड गरेका छन् । वीरगन्जको घण्टाघरमा बा १२ च ७३६५  सुजुकी कार र र ना ४ च ८०३१ नम्बर नम्बरको टाटा सूमो बन्दकर्ताहरुले तोडफोड गरेका हुन् ।

सरकारले बुधबार सातवटै प्रदेशको अस्थायी मुकाम तोकेपछि विभिन्न स्थानमा यसको विरोध भएको हो । वीरगन्ज राजधानी संघर्ष समिति पर्साले वीरगन्जलाइ प्रदेश नम्बर २ को राजधानी तोक्न माग गर्दै विगत दुइ साता देखि रिले अनशन बस्दै आएका थिए ।

सरकारले २ नम्बर प्रदेशको अस्थायी मुकाम जनकपुरलाई तोकेपछि आन्दोलन थप चर्किदै गएको हो । बन्दले वीरगन्जमा बजार, पसल, उद्योग कलकारखाना, शिक्षण संस्था, सरकारी कार्यालयका साथै सार्वजनिक यातायातका सवारीसाधनहरु बन्द रहेको छ ।

सरकारले जनकपुरलाइ अस्थायी राजधानी तोक्ने निर्णय गरे लगत्तै वीरगन्जको आन्दोलनले बन्दको रुप लिएको हो । जनकपुरलाइ अस्थायी राजधानी तोक्ने सरकारको निर्णय लगत्तै संघर्ष समितिको अगुवाइमा नेता कार्यकर्ताहरुले हिजो साँझ घण्टाघर चोकमै टायर बालेर नाराबाजी गर्नुका साथै सवारीसाधनहरुमा तोडफोड गरेपछि आन्दोलनले उग्र रुप लिएको हो ।

आन्दोलनकारीहरुले घण्टाघर चोकमा बिहिबार साँझ सिंचाइ कार्यालयको ना १ झ २६३ नम्बरको सरकारी जिपका साथै केहि टाटासुमो र मोटरसाइकलहरुमा तोडफोड गरेका थिए । 
यस्तै  सरकारले जनकपुरलाई अस्थायी मुकामन तोकेको विरोधमा बाराको विभिन्न स्थानमा प्रदर्शन भईरहेको छ ।

वीरगन्ज संघर्ष समितिको आह्वानमा गरिएको बन्दमा लामो तथा छोटोदुरीका सवारी साधनहरु चलेका छैनन् । बन्दकर्ताहरुले वीरगन्ज कलैया सडक खण्ड र वीरगन्ज पथलैया सडकखण्डमा टायर बालेर विरोध प्रदर्शन गरेका छन् । वीरगन्ज कलैयाको गण्डकमा राजकिशोर गुप्ताको नेतृत्वमा संघर्ष समितिदवारा जक्काजाम र टायर बालेर प्रदर्शन गरेको छ ।

त्यस्तै प्रसौनी गाउँपालिकाका नागरिक समाजका अध्यक्ष विनोद पटेलको नेतृत्वमा कलैया वीरगन्ज सडक खण्डको प्रर्सौनीमा बन्द गरेको छ । प्रर्सौनीमा बिहान आठ बजेदेखि १० बजे सम्म दुईघण्टा बजार समेत बन्द गरेको छ । त्यस्तै गण्डक पथलैया सडकखण्डको चैनपुरमा पनि प्रदर्शन गरेको छ । सुनिल पटेलको नेतृत्वमा बिहान आठ बजेदेखि बन्द गरिएको वीरगन्ज संघर्ष समितिका सदस्य लोकेश सिहंले जानकारी दिए 

यसैबिच संघीय समाजवादी फोरमले भने वीरगन्ज बन्दको कुनै अर्थ नरहेको बताएको छ । सरकारले अस्थायी मुकाम जनकपुर तोकेपछि हिजो साँझ प्रधानमन्त्री शेर बहादुर देउवाको पुत्ला दहन गरेर विरोध पर्दशन गरेपनि आजको बन्दको पक्षमा फोरम नेपाल नरहेको संघीय समाजवादी फोरम नेपाल पर्साका कार्यवाहक अध्यक्ष सुन्दर कुर्मीले बताए ।