काठमाडौं । काठमाडौं उपत्यकामा प्रहरीले आर्थिक वर्ष २०८३/८४ को पहिलो तीन महिनामा १ हजार १६२ जना फरार कसुरदारलाई पक्राउ गरेको छ।

अदालतबाट फैसला भई फरार रहेका उनीहरूबाट ३०२ वर्ष ४ महिना १८ दिन कैद तथा १५ करोड ७८ लाख ९८ हजार ७ सय ७ रुपैयाँ जरिवाना असुल गरिएको काठमाडौं उपत्यका प्रहरी कार्यालयले जनाएको छ।

प्रहरीका अनुसार साउनदेखि असोजसम्म शान्ति सुरक्षा र अपराध नियन्त्रणका लागि २३ हजार २ सय ४३ पटक मोबाइल गस्ती, २० हजार ८ सय ८७ पटक पैदल गस्ती, ११ हजार ३४९ पटक मोटरसाइकल गस्ती र ६ हजार १७ पटक चेकिङ गरिएको थियो। यस अवधिमा विभिन्न कारागार तथा थुनाबाट फरार रहेका थप ६७ जना कैदीसमेत पक्राउ परेका छन्।

लागुऔषध नियन्त्रणतर्फ ४ सय ४४ मुद्दा दर्ता गरी ३ सय ७८ जनालाई पक्राउ गरिएको छ। उनीहरूबाट ७२ केजीभन्दा बढी गाँजा, १३ केजीभन्दा बढी पोल्याण्ड, ७ सय ६७ ग्रामभन्दा बढी खैरो हेरोइन तथा ट्रमाडोललगायतका २ लाख ९५ हजार ६ सय ७६ एम्पुल तथा चक्की बरामद गरिएको प्रहरीले जनाएको छ।

त्यस्तै, हुण्डी कारोबारमा संलग्न पाँच जनालाई पक्राउ गरी चार मुद्दा दर्ता गरिएको छ भने १ करोड ६० लाख ८४ हजार १ सय ८० रुपैयाँ बिगो मागदाबी गरिएको छ। भन्सार छली तथा अवैध सुनचाँदी ओसारपसारमा संलग्न २७ जना पक्राउ परेका छन्। उनीहरूबाट २३ केजी ८ सय ८८ ग्रामभन्दा बढी सुनजस्तो देखिने पहेँलो धातु बरामद भएको छ।

जुवातास नियन्त्रणतर्फ १४ मुद्दा दर्ता गरी १ सय १९ जना पक्राउ परेका छन्। उनीहरूबाट ४१ लाख ४३ हजार ५ सय ७५ रुपैयाँ बरामद गरिएको छ। सार्वजनिक स्थलमा हुने अपराध नियन्त्रणका लागि गरिएको स्विप अपरेशनमा २ हजार ७ सय ३४ जनालाई नियन्त्रणमा लिएर अनुसन्धान गरिएको छ।

 महिला तथा बालबालिकामाथि हुने दुर्व्यवहार रोक्न सञ्चालन गरिएको सेफ्टी पिन अपरेशनमा ६ सय ३७ जना पक्राउ परेका छन्। तीमध्ये ६३ जनाविरुद्ध ४३ मुद्दा दर्ता गरिएको छ भने ५ सय ७४ जनालाई सचेत गराई आफन्तको जिम्मा लगाइएको छ।

सवारी सुरक्षा अभियानअन्तर्गत मादक पदार्थ सेवन गरी सवारी चलाउने ६ हजार ९ सय ३८ र लागुऔषध सेवन गरी सवारी चलाउने ७८ चालकलाई कारबाही गरिएको छ।

 सवारी साधन चोरी तथा हराएको भन्दै परेका ५ सय २१ उजुरीमध्ये २ सय ५७ वटा सवारी साधन फेला पारिएको छ। तीमध्ये २ सय २१ वटा धनीलाई फिर्ता गरिएको र चोरीमा संलग्न ३४ जना पक्राउ परेका छन्।

चाडपर्व सुरक्षामा ८ हजार ६ सय ६८ प्रहरी परिचालन

चाडपर्व लक्षित विशेष सुरक्षा योजनाअन्तर्गत असोज १८ देखि कात्तिक १८ गतेसम्म काठमाडौं उपत्यकामा ८ हजार ६ सय६८ जना प्रहरी परिचालन गरिएको थियो। योजनाअनुसार कमान्ड पोस्ट स्थापना, पैदल तथा सवारी गस्ती, सादा पोसाकमा प्रहरी परिचालन, ३७ वटा यात्रु तथा नागरिक सहायता डेस्क स्थापना र २२ वटा नाकामा चौबिसै घण्टा चेकिङ गरिएको थियो। संवेदनशील क्षेत्रमा कुकुर, सीसीटीभी तथा ड्रोनमार्फत समेत निगरानी गरिएको थियो।

विशेष सुरक्षा योजनामा जुवातास खेल्ने तथा खेलाउनेविरुद्ध १२ मुद्दा दर्ता गरी ९१ जनालाई पक्राउ गरिएको छ। उनीहरूबाट २८ लाख ७९ हजार ७ सय ७५ रुपैयाँ र ४९ बुक तास बरामद भएको छ।

 त्यस्तै, अवैध पटाका आयात तथा बिक्री वितरणमा संलग्न १२ जना पक्राउ परेका छन्। उनीहरूबाट ३४ हजार ३ सय ५७ थान विभिन्न पटाका, १३ हजार ८ सय ४९ प्याकेट सिल्भर टर्चर तथा पड्किने पटाका बरामद गरिएको छ। तीन बोरा बेवारिसे पटाकासमेत जफत गरिएको प्रहरीले जनाएको छ।

काठमाडौं उपत्यका प्रहरी कार्यालयले नियमित सुरक्षा कारबाही तथा चाडपर्व लक्षित अभियानबाट अपराध नियन्त्रण र शान्ति सुरक्षा कायम गर्न सहयोग पुगेको जनाएको छ। प्रहरीले दीपावली तथा छठ पर्वका अवसरमा जुवातास खेल्ने, खेलाउने तथा पटाका र विस्फोटक पदार्थ पड्काउने गतिविधि नगर्न सर्वसाधारणलाई आग्रह गर्दै शान्तिपूर्ण रूपमा चाडपर्व मनाउन अनुरोध गरेको छ।