वीरगन्ज । सरकारले भारी वर्षा, बाढी, पहिरो र चट्याङलगायत प्राकृतिक विपद्को जोखिमलाई ध्यानमा राख्दै नागरिकलाई सतर्क रहन र सुरक्षित स्थानमा बस्न आग्रह गरिरहेका बेला वीरगन्जस्थित नेशनल मेडिकल कलेज तथा शिक्षण अस्पतालले आवासीय चिकित्सकलाई १२ घण्टाभित्र होस्टेल खाली गर्न निर्देशन दिएको छ ।

कलेज प्रशासनले जारी गरेको सूचनामा हालको शैक्षिक तथा संस्थागत परिस्थितिलाई ध्यानमा राख्दै शैक्षिक सत्र २०८२ का प्रथम वर्षका स्नातकोत्तर आवासीय चिकित्सकलाई संस्थाबाट फिर्ता बोलाइदिन चिकित्सा शिक्षा अध्ययन संस्थान , त्रिभुवन विश्वविद्यालयसमक्ष औपचारिक अनुरोध गरिएको उल्लेख छ ।

त्यसअनुसार अर्को सूचना जारी नभएसम्म प्रथम वर्षका स्नातकोत्तर आवासीय चिकित्सकहरूको कक्षा, शैक्षिक गतिविधि, क्लिनिकल पोस्टिङ, विभागीय प्रशिक्षण, वार्डरइमर्जेन्सी ड्युटीलगायत प्रशिक्षण गतिविधि स्थगित रहने कलेजले जनाएको छ ।

तर, यही सूचनामार्फत कलेजले आवासीय चिकित्सकलाई सूचना जारी भएको समयदेखि १२ घण्टाभित्र आफूलाई उपलब्ध गराइएको छात्रावासको कोठा, क्वार्टर वा अन्य आवासीय सुविधा खाली गरी कलेजको छात्रावासरप्रशासन कार्यालयमा सम्पत्ति बुझाउन निर्देशन दिएको छ ।

सम्बन्धित चिकित्सकलाई तोकिएको अवधिभित्र आवश्यक हस्तान्तरण प्रक्रिया पूरा गरी आवासीय परिसरबाट आफ्ना व्यक्तिगत सामानसमेत हटाउन भनिएको छ ।

विपद्को समयमा चिकित्सकलाई कहाँ जाने प्रश्न 

कलेजको यो निर्णय सार्वजनिक भएसँगै प्राकृतिक विपद्को सम्भावित जोखिमबीच आवासीय चिकित्सकलाई तत्काल होस्टेल खाली गर्न लगाउनु कति व्यवहारिक र मानवीय हो भन्ने प्रश्न उठेको छ ।

सरकार तथा सम्बन्धित निकायले भारी वर्षा, बाढी, पहिरो र चट्याङको जोखिम रहेको भन्दै नागरिकलाई अनावश्यक आवतजावत नगर्न र सुरक्षित स्थानमा बस्न आग्रह गरिरहेका बेला चिकित्सकहरूलाई १२ घण्टाभित्र संस्थागत आवास छाड्न लगाउँदा उनीहरूको सुरक्षित बसोबासको वैकल्पिक व्यवस्था के हुन्छ भन्ने प्रश्नसमेत उठेको छ ।

विशेषगरी आवासीय चिकित्सकहरू अस्पतालको नियमित स्वास्थ्य सेवा र प्रशिक्षणसँग जोडिएका जनशक्ति भएकाले उनीहरूको आवास व्यवस्थापनसम्बन्धी निर्णय गर्दा सुरक्षा, वैकल्पिक आवास, आकस्मिक स्वास्थ्य सेवा र मानवीय पक्षलाई समेत ध्यान दिनुपर्ने आवाज उठ्न थालेको छ ।

कलेज प्रशासनले भने सूचना जारी गर्दै आफ्नो निर्णय कार्यान्वयन गर्न सम्बन्धित सबैलाई निर्देशन दिएको छ ।

सरकारको ‘सुरक्षित ठाउँमा बसौँ’ भन्ने आग्रह र त्यसै समयमा मेडिकल कलेजको ‘१२ घण्टाभित्र होस्टेल खाली गरौँ’ भन्ने निर्देशनबीचको यो विरोधाभासले अहिले वीरगन्जमा नयाँ बहस सिर्जना गरेको छ ।