श्रीमतीको हत्यागरि फरार रहेका श्रीमान पाँच वर्षपछि गिरफ्तार

इसीमाना सम्वाददाता २०८१ फागुन ८ गते ०१: ३२ मा प्रकाशित 147 पटक पढिएको

राजविराज । आफ्नै श्रीमतीको हत्या गरि फरार रहेका एक जना व्यक्तिलाई सप्तरी प्रहरीले ५ बर्ष पछी पक्राउ गरेको छ ।

पक्राउ पर्नेमा सप्तरी जिल्लाको शम्भुनाथ नगरपालिका वडा नं.२ वस्ने सन्तोष साह रहेको जिल्ला प्रहरी कार्यालय सप्तरीले जनाएको छ ।

प्रहरीका अनुसार साहले आफ्नी श्रीमती गायत्री कुमारी साहलाई ०७६ सालको चैत्र ६ गते राती मरणासन्न हुने गरि कुटपिट गरि घर नजिकै रहेको पुर्व पश्चिम राजमार्ग देखि करिब ४ सय मिटर उत्तर तर्फ फालेर फरार भएका थिए ।

घटना भएको भोलि पल्ट बिहान साढे ५ बजेको समयमा सोही ठाउँका स्थानीय तथा आफन्तले गायत्रीलाई गम्भीर अवस्थामा फेला पारी उपचारको लागि यूनिक अस्पतालमा भर्ना गरेकोमा सोही दिन उपचारको क्रममा उनकोको मृत्यु भएको थियो ।

सन्तोष र मृतक गायत्रीको बिवाह भएको करिब ९ महिना मात्रै भएको थियो । श्रीमान् श्रीमतीबीच पटक पटक विवाद भई झैझगडा हुँदै आएको प्रहरीको भनाई छ ।

सप्तरी प्रहरीले कर्तव्य ज्यान मुद्दामा सन्तोष साहका विरुद्ध मुद्दा दर्ता गरी कारवाही चलाएको थियो ।

सप्तरी जिल्ला अदालत राजविराजबाट दिन ३ को म्याद थप भई अनुसन्धान कार्य भईरहेको जिल्ला प्रहरी कार्यालयका प्रहरी नायब उपरीक्षक जितेन्द्र कुमार बस्नेतले जानकारी दिएका छन्।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।