पप्पु कन्स्ट्रक्सन फेरि कालोसूचीमा परेको छ । विकास निर्माणका विभिन्न आयोजनाको ठेक्का लिएर समयमै काम नगर्ने निर्माण व्यवसायीको छवि बनाएको हरिनारायण रौनियारको कम्पनी पप्पु कन्सट्रक्सन फेरि कालोसूचीमा परेको हो । तर अहिले यो कन्स्ट्रक्सन छोरा सुमित रौनियारले सम्हालेका छन् ।

प्रधानमन्त्री तथा मन्त्रिपरिषदको कार्यालय मातहत रहेको सार्वजनिक खरिद अनुगमन कार्यालयले पप्पुसँग संयुक्त उपक्रममा रहेको बाम्ती जेभी समेत कालोसूचीमा परेको छ ।

अनुगमन कार्यालयका अनुसार हुलाकी राजमार्गको विभिन्न ठेक्का लिएको पप्पु बाम्ती जेभी अनामनगरलाई एक वर्षसम्म कालोसूचीमा राखिएको छ ।

पटक–पटक तोकिएको निर्माण कार्य पूरा गर्न सडक विभाग, हुलाकी राजमार्ग निर्देशनालयले निर्देशन दिए पनि अटेर गरेका कारण उनीहरुलाई कालोसूचीमा राखिएको हो । 

सार्वजनिक खरिद अनुगमन कार्यालयका अनुसार तोकिएको जिम्मेवारी पूरा नगरेको तथा आयोजनाको काममा गम्भीर लापरबाही गरेको आरोप पप्पुलाई छ । साथै सरकारी स्रोतको दुरुपयोग गरेको पाइएपछि २ वटा आयोजनाले एकैपटक बाम्तीका विश्वास झा सहित सुमीत रौनियारलाई कालोसूचीमा राखिएको हो ।

यस्तै सो कार्यालयले विजी कन्सट्रक्सन चांगुनारायण भक्तपुरका गौतम दुलाल र श्रीहरि सेतीदेवी जेभी मनहरि मकवानपुरका हरिहर चौलागाईलाई समेत एकवर्षका लागि कालोसूचीमा राखेको छ ।

विशेष गरी सडक विभागले निर्माण गरिरहेको हुलाकी राजमार्गको काम झण्डै २ दशकदेखि अलपत्र  छ । नेपाल भारत सीमा नजिक सहज यातायात आवगमनका लागि निर्माण भइरहेको हुलाकी राजमार्गमा सरकारकै भाषामा भन्ने हो भने चरम लापरबाही हुँदै आएको छ ।

सो आयोजनाको योजना कार्यालय कपिलवस्तुले २ खण्डको काममा लापरबाही भएको ठहरसहित सार्वजनिक खरिद अनुगमन कार्यालयलाई पत्र लेखी कालोसूचीमा राख्न आग्रह गरेको थियो ।  तराईको लाइफ लाईन हुलाकी सडक बनाएन भनेर काठमाण्डौलाई धारेहात लाउनेहरु ठेक्का लिएर सडक निर्माण नगरि अलपत्र छोडने पप्पुहरुका बारेमा भने केही बोल्दैनन । 

यस अघि सांसद रौनीयारको कम्पनी ५ फागुण २०७६ मा उपत्यका सडक बिस्तार आयोजनाको काम समयमै र गुणस्तरीय नगरेका कारण ३ वर्षकालागि कालोसूचीमा परेको थियो । काठमाण्डौको तीन कुनेको पूल निर्माणमा गरेको लापरवाहीका कारण  पनि कालो सूचीमा परेको थियो ।

०७५ कार्तिकमा सिक्टा सिचाईको डुडुवा नहर निर्माणमा ढिलाई गरेका कारण पनि पप्पु कालोसूचीमा परेको थियो । हुलाकी सडक निर्माणमा गरेको लापरवाहीका कारण ०७६ माघमा पनि पप्पु र रमण दुबै कालो सूचीमा परेका थिए । 

पप्पुका तत्कालीन प्रवन्ध निर्देशक हरिनारायण रौनीयारको पहलमा सकड बन्यो,अस्पताल बन्यो जस्ता समाचार आइरहेका हुन्छन । रौनीयरको यो पहलकदमी अव  छोराको कम्पनी तर्फ केन्द्रीत हुनु पर्ने बिशलेषकहरुले टिप्पणी गरेका छन । 

रौनीयारले आफनै छोराले  लिएको ठेक्का का काम बेलैमा गर्न पहल गरिदिए पर्साबासीको आर्शिवाद लाग्ने उनीहरुको टिप्पणी छ । 
पप्पु कन्स्ट्रक्सन प्रालिले गृहजिल्ला पर्सामा ठेक्का लिएको पुल निर्माण नौ वर्षदेखि अलपत्र छ। रौनीयार आफै कम्पनीको प्रवन्धक हुदा लिएको ठेक्का हो पर्साको पर्सागढी नगरपालिका–९ एकटाङगास्थित तिलावे नदीको पुल   ।

 सडक विभागले ०६८ साल साउन २७ गते पप्पु कन्स्ट्रक्सनसँग सम्झौता गरेको थियो। सम्झौताअनुसार पुल ०७० साल साउन २८ गतेभित्र निर्माण सम्पन्न गरिसक्नुपर्ने थियो। अहिले सम्म बनेको छैन । निलम्वित सांसद रौनीयारलाई  कम्पनीका प्रवन्धक छोरा सुमीत रौनीयारसंग पहल गरेर पूल निर्माण गराईदिन स्थानीयले सुझाव समेत दिएका छन ।  

०७४ असोज १९ मा  अख्तियार दुरुपयोग अनुसन्धान आयोगले रौनियार र  छोरा सुमित विरुद्ध जनही १९ करोड ३२ लाख २५ हजार ६९५ रुपैयाँ बिगोदाबीसहित मुद्दा दायर गरेको थियो । पप्पु कन्स्ट्रक्सनका मालिकका रूपमा रौनियारविरुद्ध मुद्दा दायर भएको थियो । बबई नदीमा निर्माण भएको पुलमा भ्रष्टाचार गरेको भन्दै अख्तियारले मुद्दा दायर गरेको थियो ।

निर्माण भएको केही महिनामा नै पुल भत्किएको थियो । त्यही मुद्धाका कारण रौनीयार सासंसद पदबाट निलम्वित हुनु भएको हो ।  पप्पु कन्स्ट्रक्सन हाल छोरा सुमितको नाममा छ । पप्पुले नै रौतहटको गौरमा पुल निर्माणमा ढिलाइ गर्दा डुंगामार्फत खोला तर्न बाध्य स्थानीय  दुर्घटनामा परेका थिए । ९ भदौ ०७५ मा भएको डुंगा दुर्घटनामा पाँचजनाको मृत्यु भएको थियो ।