तस्विर एआई जेनरेटेड हो

वीरगञ्ज । बारा र पर्साका विभिन्न सीमावर्ती क्षेत्रमा प्रहरीकै संरक्षणमा तस्करी, जुवा तथा अवैध घरेलु मदिराको कारोबार भइरहेको आरोप सार्वजनिक भएको छ। 

सीमावर्ती क्षेत्रमा प्रहरीको मिलेमतोमा अवैध गतिविधि सञ्चालन भइरहेको र त्यसबापत नियमित रूपमा रकम उठाउने गरिएको स्रोतको दाबी छ।

हालै बारा र पर्साका विभिन्न नाकाको छड्के अनुगमन गरेर चर्चामा आएका गृहमन्त्री सुदन गुरुङको निर्देशनपछि पनि सीमावर्ती क्षेत्रमा अवैध गतिविधि नरोकिएको स्रोतको आरोप छ।

विशेषगरी बारा जिल्लाका मुसहरवा, कवही गोठ, सिम्रौनगढ, कचोर्वा, मटिअर्वा र छतवा तथा पर्साको अलौ र सिर्सियालगायतका नाकाबाट अवैध ओसारपसार हुने गरेको दाबी गरिएको छ।

त्यस्तै, बाराको नकटुवा तथा प्रस्टोका–बेलहिया क्षेत्रमा ठूला जुवाका खाल सञ्चालन हुने गरेको स्रोतले जनाएको छ। जुवा सञ्चालनमा केही स्थानीय प्रभावशाली व्यक्ति तथा सञ्चारकर्मीसमेत संलग्न रहेको आरोप लगाइएको छ।

प्रहरीको मिलेमतोमा ‘लाइन’ चलाएको आरोप

स्रोतका अनुसार सीमावर्ती क्षेत्रमा तस्करीका लागि निश्चित व्यक्तिहरूलाई सामानअनुसार ‘लाइन’ दिने गरिएको छ। कपडा, किराना, हार्डवेयरलगायतका सामान ओसारपसारका लागि छुट्टाछुट्टै समूह परिचालन हुने र त्यसबापत रकम उठाउने गरिएको दाबी गरिएको छ।

यसैगरी, वीरगञ्ज तथा आसपासका क्षेत्रमा सञ्चालनमा रहेका केही ढुवानी तथा क्यारियर व्यवसायबाट समेत मासिक रूपमा रकम उठाउने गरिएको आरोप छ। विभिन्न ट्रान्सपोर्ट तथा क्यारियर व्यवसायीबाट ‘नजराना’ का नाममा रकम असुल्ने गरिएको स्रोतको दाबी छ।

सादा पोसाकका प्रहरीमाथि पनि प्रश्न

अवैध गतिविधिबाट रकम उठाउन केही प्रहरी कर्मचारीलाई सादा पोसाकमा परिचालन गरिएको आरोपसमेत सार्वजनिक भएको छ।

स्रोतका अनुसार अमलेखगञ्ज, जीतपुर तथा जिल्ला प्रहरी कार्यालयको अपराध शाखासँग सम्बन्धित केही प्रहरी कर्मचारीले अवैध कारोबारमा संलग्न व्यक्तिहरूसँग रकम उठाउने काम गर्दै आएका छन्।

घरेलु मदिराको कारोबार पनि बढेको दाबी

अमलेखगञ्ज क्षेत्रमा अवैध रूपमा घरेलु मदिरा उत्पादन गरी जीतपुर तथा वीरगञ्जका विभिन्न भट्टीमा बिक्री–वितरण हुने गरेको स्रोतको दाबी छ। प्रहरीलाई नियमित रकम बुझाएर यस्तो कारोबार सञ्चालन गर्ने गरिएको आरोपसमेत लगाइएको छ।

प्रहरी अधिकारीमाथि गम्भीर आरोप

स्रोतले जिल्ला प्रहरी कार्यालय बाराका प्रहरी उपरीक्षक नरेन्द्र कुँवर, प्रहरी निरीक्षक प्रकाश खड्का र अपराध शाखाका प्रहरी सहायक निरीक्षक नारायण लुइँटेलको संलग्नतामा अवैध गतिविधि सञ्चालन भइरहेको दाबी गरेको छ।

यद्यपि, यो आरोपको स्वतन्त्र पुष्टि भएको छैन।

अनुसन्धान र छानबिनको माग

सीमावर्ती क्षेत्रमा तस्करी, जुवा र अवैध मदिराको कारोबारबारे सार्वजनिक भएका आरोपले सुरक्षा संयन्त्रको भूमिकामाथि गम्भीर प्रश्न उठाएको छ।

गृहमन्त्रीको निर्देशनपछि समेत यस्ता गतिविधि जारी रहेको हो भने त्यसबारे निष्पक्ष छानबिन आवश्यक देखिन्छ।

विशेषगरी सीमावर्ती क्षेत्रमा ‘लाइन’ र मासिक रकम असुलीको आरोप सत्य भए सम्बन्धित प्रहरी कर्मचारी तथा संलग्न व्यक्तिमाथि अनुसन्धान गरी कारबाही गर्नुपर्ने माग उठ्न सक्छ।