बीरगंज १ चैत । उपभोक्ताको हक कार्यान्वयन गराउने नियमनकारी निकायले नै पर्सामा उपभोक्ताहरु बिक्रेताहरुबाट व्यापक रुपमा ठगिदै आएको बताएको छ ।

विश्व उपभोक्ता दिवसको अवसरमा कन्जुमर आइ नेपाल पर्साले वीरगन्जमा आज आयोजना गरेको उपभोक्त हक संरक्षणमा स्थानीय तहको भूमीका विषयक विचार गोष्ठीमा बोल्दै पर्साका प्रमुख जिल्ला अधिकारी विनोद प्रकाश सिंहले पर्सामा बिक्रेताहरुबाट उपभोक्ताहरु व्यापक रुपमा ठगिएको बताएका हुन  ।

उनले  उपभोक्ताहरु आफै सचेत नभएका कारण पनि बिक्रेताहरुबाट ठगिने क्रम निरन्तर चलिरहेको बताए । उनले उपभोक्ताको हक संरक्षणको सवाल, स्थानीय तहको प्राथमिकतामा नै पर्न नसकेको पनि बताए  ।

उनले उपभोक्ताको हक  कार्यान्वयनमा छ कि छैन भनेर नियमन गर्ने जिम्मेवारी अहिले स्थानीय तहमा आएको भएपनि जनप्रतिनिधिहरुले यस विषयमा चासो समेत नदेखाएको आरोप लगाए ।

उपभोक्तालाइ ठग्ने बिक्रेता र उत्पादकहरुको नियमन र कार्वाहीका लागि पहलकदमी लिन पर्साका सबै स्थानीय तहलाइ आफुले पटक पटक आग्रह गर्दै आएको भएपनि यसमा उनीहरुले सहयोग नगरेको प्रजिअ सिंहको भनाई छ ।  

पसलहरुमा क्रेताले स्पष्ट देख्ने गरि सामानको मुल्य सूची अनिवार्य राख्नु पर्नेमा  वीरगन्जमा रहेका पसलहरुमा भने मुल्य सूची नराखेको  अवस्था रहेको भन्दै प्रमुख जिल्ला अधिकारी सिंहले पसलमा बिक्री गर्न राखिएका मालसामानमा बिक्री मुल्य पनि अंकीत नभएका कारण पनि उपभोक्ताहरु  बिक्रेताहरुबाट ठगीने गरेको बताए ।

वीरगन्ज महानगरपालिका कार्यालयका कानूनी सल्लाहकार एंव अधिवक्ता कमल मोहन पोखरेलले संविधानमा उपभोक्ताको हक, मौलीक हकमै सुनिश्चित गरिएको भएपनि नियमनकारी निकायको उदासीनताका कारण उपभोक्ताहरु ठगिने क्रम नरोकिएको बताए  ।

नयाँ संविधानले उपभोक्ता हक कार्यान्वयनको जिम्मेवारी स्थानीय तहलाइ दिएको भनिए पनि त्यसमा स्पष्टता नभएका कारण जनप्रतिनिधिहरु नै अन्यौलमा रहेको अधिवक्ता पोखरेलको भनाइ छ ।

उपभोक्ता हक संरक्षण गर्ने पहिलो जिम्मेवारी राज्यको भएपनि उ आफनो जिम्मेवारीबाट पन्छिन खोजेको अवस्था रहेको भन्दै अधिवक्ता पोख्रेलले उपभोक्ता हकको नाममा खुलेका संघसंस्थाहरु पनि नाम मात्रको भएको आरोप लगाउनु भयो । उपभोक्ता सचेत , बिक्रेता जवाफदेही  र नियमनकारी निकाय उत्तरदायी भए मात्र उपभोक्ता गठिने क्रम रोकिने उनले बताए  ।

नेपाली काँग्रेस पर्साका सचिव श्याम पटेलले राज्यको उदाशीनता र उपभोक्तावादी संघसंगठनको निस्कृयताका कारण आम उपभोक्ताहरु बिक्रेताहरुबाट लुटिन बाध्य भएको बताए  ।

कन्जुमर आइ नेपाल पर्साका अध्यक्ष केसी लामिछानेको अध्यक्षतामा भएको कार्यक्रममा नेपाल पत्रकार महासंघ पर्साका उपाध्यक्ष अनुप तिवारी, पत्रकार महेशचन्द्र गौतम, माछा मासु व्यवसायी संघ वीरगन्जका सचिव ग्यासु मियाँ देवान, नेविसंघका नेता दिलिपराज कार्की, अखिल क्रान्तिकारीका नेता प्रभाकर गुप्ताका साथै विभिन्न संघसंस्थाका प्रतिनिधि, सन्चारकर्मी लगायतको सहभागीता रहेको थियो ।