मुस्लिमलाई मुख्यमंत्री बनाएको बिरोधमा हिन्दुवादीद्वारा यादवको पुत्ला दहन

2/12/2018 गते 00 00 मा प्रकाशित 1159 पटक पढिएको

बीरगंज २९ माघ ।
वीरगन्जमा हिन्दुवादी संगठनले सोमबार वीरगन्जमा संघीय समाजवादी फोरम नेपालका अध्यक्ष उपेन्द्र यादवको पुत्ला जलाएका छन।

विश्व हिन्दु परिषदका कार्यकर्ताहरुले बीरगंजको घण्टाघरमा यादवको पुतला दहन गरेका हुन । गेरुवा रंगको झण्डा सहित पुतला बोकेर घण्टाघर चोकमा पुगेका सानो समुहले पुतला जलाएको हो । प्रदेश नम्बर दुईमा फोरमले मुख्यमंत्रीमा एक जना मुस्लिम नेतालाई अगाडि सारेकोमा बिश्व हिन्दू परिषदले अध्यक्ष यादवको पुत्ला जलाएको हो ।

प्रदर्शनकारीहरुले हिन्दुविरोधी उपेन्द्र यादव मुर्दावाद, मुस्लिमलाई मुख्यमन्त्री बनाउन पाइँदैन जस्ता नारा लगाएर प्रदर्शन गरेका थिए । फोरम नेपाल र उसका अध्यक्ष उपेन्द्र यादवले प्रदेश नम्बर २ को मुख्यमन्त्री मुस्लिम धर्मका व्यक्तिलाई बनाउन लागेको भन्दै विश्व हिन्दु परिषदले यादवको पुत्ला जलाएको प्रदर्शनमा सहभागी अजय कुमार कानुले बताए ।

फोरम नेपालले प्रदेश नम्बर २ को संसदीय दलको नेतामा पार्टीका राष्ट्रिय उपाध्यक्ष एवम् प्रदेश सांसद लालबाबु राउत गद्धीलाई चयन गरिसकेको छ । लालबाबु वीरगन्जकै स्थायीबासिन्दा हुन् । उनी, पर्साको क्षेत्र नम्बर १ ख बाट प्रदेशसभा सांसदमा निर्वाचित भएका थिए ।

पुत्ला दहनको अगुवाइ गरेका विश्व हिन्दु परिषदको प्रदेश नम्बर २ का अगुवा ज्योतिलाल कलवारले प्रदेश नम्बर २ मा बहुसंख्यक हिन्दुमाथि कुठाराघात गर्दै फोरम नेपाल र यादवले मुस्लिम धर्मका मानिसलाई मुख्यमन्त्री बनाउने निर्णय गरेकाले विरोध प्रदर्शन गरिएको बताए ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।