वीरगञ्ज   २९मंसिर । पर्साको समानुपातिक तर्फपनि सघीय समाजवादी फोरम नेपाल अग्रस्थानमा रहेको छ । बारा जिल्लामा भने प्रत्यक्ष तर्फ खराव नतिजा ल्याएको नेपाली कांग्रेसले पहिलो स्थान ओगटेको छ ।   

पर्सामा कुल २ लाख ८९ हजार ५५ मतदाता रहेका छन । ७१ प्रतिशतले आफनो मताधिकारको प्रयोग गरेका थिए । समानुपातिक तर्फ पर्सा जिल्लाको प्रतिनिधि र प्रदेशसभा दुवैमा संघीय समाजबादी फोरम नेपाल पहिलो भएको हो ।

दोस्रो स्थानमा नेपाली कांग्रेस छ । दशमै पहिलो स्थानमा रहेको एमाले पर्सामा भने तेश्रो स्थानमा  ।

पर्सामा प्रत्यक्षतर्फ ४ वटै प्रतिनिधिसभा र ८ प्रदेशसभामध्ये ६ प्रदेशसभा सदस्यमा फोरम नेपाल बिजयी भएको छ  ।

पर्सामा प्रतिनिधिसभाको समानुपातिकमा संघीय समाजवादी फोरम नेपालले कुल ५३ हजार ८ सय २१ मत पाएको छ भने कांग्रेसले ५० हजार ५ सय ९२ मत ल्याएको छ । तेस्रो स्थानमा रहेको नेकपा एमालेले २२ हजार १ सय ५६ मत पाएको छ भने राजपा नेपालले १७ हजार ४ सय १४ मत हासिल गरेको छ । माओवादी केन्द्रले ११ हजार ८ सय १९ मत बटुलेको छ ।

नेपाल संघीय समाजवादी पार्टीले ११ हजार १ सय ६३ मत प्राप्त गरेको छ । राप्रपा प्रजातान्त्रिकको पक्षमा १ हजार ३ सय ७५ मत परेको छ भने विवेकशील साझा पार्टीले १ हजार ३ सय १ मत पाएको छ ।

समानुपातिक तर्फ पर्सामा ४९ वटा दलले मत पाएका छन् । खम्बुवान लोकतान्त्रिक पार्टी नेपालले सबैभन्दा कम १२ मत ल्याएको छ ।

यस्तै पर्सामा प्रदेशसभाको समानुपातिकमा पनि फोरम नेपालले नै लोकप्रिय मत हासिल गरेको छ । फोरम नेपालले कुल ५१ हजार २ सय २० मत पाएको छ । दोस्रो स्थामा रहन सफल कांग्रेसले ४५ हजार २ सय ७३ मत बटुल्यो भने एमालेले १९ हजार २ सय ९८ मत पाएको छ ।

राजपा चौथो भएको छ । यसले १५ हजार ५ सय २३ मत प्राप्त गरेको छ । नेपाल संघीय समाजवादी पार्टीले १२ हजार १ सय २० मत ल्यायो । माओवादीले १० हजार ५ सय ९२, राप्रपाले ४ हजार १ सय ५४, राप्रपा प्रजातान्त्रिकले २ हजार ९ मत ल्याए ।

प्रदेश सभामा २९ वटा दलले मत पाएका छन् । सबैभन्दा कम मत मंगोल नेशनल अर्गनाईजेशनले ल्याएको छ । यसले पाएको मत मात्रै २६ छ ।

बारामा समानुपातिकमा काँग्रेस अगाडि
बारा जिल्लामा नेपाली कांग्रेस प्रतिनिधि र प्रदेश सभामा समानुपतिकतर्फ सर्वाधिक मत ल्याउन सफल भएको छ । बाराका ४ प्रतिनिधि सभा सदस्य मध्य एकमा नेपाली कांग्रेसले बिजय हासिल गरेको छ ।

बाराका ४ प्रतिनिधि सभा सदस्यमा फोरमले २ स्थान र राजपाले १ स्थानमा बिजय प्राप्त गरेका छन । प्रदेश सभाका ८ सदस्यमा एमाले २, माओवादी केन्द्र १, राजपा २ र फोरम नेपाल ३ स्थानमा विजयी भएका थिए ।

बारामा कांग्रेसले प्रतिनिधिसभामा ४९ हजार ९ मत पाएको छ भने प्रदेश सभामा ४५ हजार ९ सय ३१ मत प्राप्त गर्न सफल भएको छ । दोस्रो स्थानमा रहेको एमालले प्रतिनिधि सभामा ४३ हजार ३ सय मत पाएको छ भने प्रदेश सभामा ३८ हजार ९ सय ६३ मत पाएको छ ।

तेस्रो स्थानमा रहेको फोरम नेपालले प्रतिनिधिसभातर्फ ४२ हजार ५ सय ९२ मत बटुल्यो । निर्वाचन अधिकृतको कार्यालयले दिएको जानकारी अनुसार, फोरमले प्रदेशसभामा ३८ हजार ८ सय ९३ मत ल्याएको छ ।

चौथोमा रहेको राजपा नेपालले प्रतिनिधिसभामा ३० हजार ५ सय ३६ र प्रदेशसभामा २७ हजार ६ सय ५३ मत ल्यायो । माओवादी केन्द्रले प्रतिनिधिसभामा पाएको मत १५ हजार ९ सय ७ छ भने प्रदेशसभातर्फ उसले १६१८१ मत बटुलेको छ ।