वीरगन्ज १० मंसिर । सडक दुर्घटना न्युनीकरण गर्न नेपाल प्रहरीले मुलुकभर मादक पदार्थ सेवन (मापसे) गरी सवारी चलाउनेलाई कारवाही अभियान चलाएको छ । पर्सामा भने प्रहरीले मापसे गरी सवारी साधन चलाउनेलाई प्रोत्साहन गर्दै आएको पाइएको छ ।

मापसे गरी मोटरसाइकल दुर्घटनामा परि दुई महिना अगाडि मात्र वीरगन्जका युवा अमित तिवारीको सुरेश आयल अगाडि रोकिराखेको मिनी ट्रकमा ठक्कर दिदा मृत्यू भएको थियो ।

तिवारीको प्रहरीसंग राम्रो सम्बन्ध थियो । दुर्घटना हुने रातिपनि उनी जिल्ला प्रहरी कार्यालय अगाडि दुई जना इन्सपेक्टरलाई भेट गरि फर्किने क्रममा दुर्घटनामा परेका थिए ।

अत्यधिक मदिरा सेवन गरेका तिवारीले हेल्मेट समेत लगाएका थिएनन् । त्यो राती प्रहरीले उनलाई नियन्त्रणमा लिएर सचेत गराएको भए त्यो दुखद दुर्घटना हुदैन्थ्यो । 

शनिबार राती वीरगन्जको पानीट्यांकी अगाडिको मूख्य सडकमा राती करिब १० बजे मुर्ली चोक तर्फबाट घन्टाघर तिर तीव्र गतिमा गइरहेको एउटा कार अनियन्त्रीत भई डिभाइडर माथि चढेको थियो । बा १७ च ५००७ नम्बरको उक्त गाडी संघीय समाजवादी फोरम नेपालका जिल्ला कोषाध्यक्ष रविन्द्र वर्णवालले चलाइरहेका थिए ।

गाडीमा अत्यधिक क्षति भएको छ भने डिभाइडरमा रोपिएको रुख विरुवाहरु ढालिएका छन् । रडहरु भाचिएका छन् ।

पानीट्यांकीका स्थानीयहरु उद्धार गर्न पुग्दा अत्यधिक मदिरा सेवन गरेका वर्णवाल नशामा धुत थिए । दुर्घटनास्थल अगाडिनै घर भएका पत्रकार अमित अग्रवालले दुर्घटनाको तस्विर सामाजिक सञ्जालमा सार्वजनिक गरेका हुन् । 

अग्रवालका अनुसार जिल्ला प्रहरी कार्यालयबाट आएका प्रहरी सहायक निरीक्षकको टोलीले वर्णवाललाई नियन्त्रण लिदा उनी हिड्न पनि सक्ने अवस्थामा थिएनन । खुट्टा नटेक्ने गरी रक्सी सेवन गरेका वर्णवाललाई पर्साका एसपी डा. गणेश रेग्मीले वीरगन्ज महानगरपालिकाका मेयर विजयी सरावगीको दबाबमा जिल्ला पुगेको केही बेरमै छाडेका थिए ।

एसपी रेग्मीले वर्णवालले मदिरा सेवन नगरेकाले राती नै छाडिएको दाबी गरेतापनि उनले वर्णवालको मेडिकल रिर्पोट भने गराएका छैनन् । वर्णवाललाई प्रहरीले एकरात राखेको भए उनीमा सुधार आउने थियो । कम्तीमा सवारी चलाउदा रक्सी सेवन गर्न हुदैन भन्ने ज्ञात हुन्थ्यो । तर वर्णवालले शक्तिको आडमा बिना कुनै नसिहत उन्मुक्ति पाएका छन ।

शक्तिको दम्भमा परेर भोलीका दिनमा रक्सी सेवन गरेर सवारी चलाएर उनी ठुलै दुर्घटनामा परे भने त्यसको जावफदेही कसले लेला ? दुर्घटना भएपछि जोसुकैको पनि सरकारी अस्पतालबाट मेडिकल रिर्पोट गराउनु पर्ने भएपनि प्रहरीले वर्णवाललाई अस्पताल नलगि मेयरको दबाबमा छाडेको हो ।

सरावगी निकट मानिने वर्णवाल मेयरको चुनावमा आर्थिक बाडफाडको काम सम्हालेका थिए । वीरगन्ज उद्योग वाणिज्य संघका कोषाध्यक्ष समेत रहेका वर्णवाल मेयर सरावगीका बिजनेस पार्टनर पनि हुन् । वर्णवालकी श्रीमती रागिनी देवी वर्णवाल संघीय समाजवादी फोरम नेपालको तर्फबाट प्रदेश सभाको समानुपातिक सांसदमा सिफारिस भएको छिन् ।