वीरगन्ज– आफ्नो राजनीतिक जीवनमा अस्थिर रहँदै आएका वीरगन्जका पूर्व मेयर विमलप्रसाद श्रीवास्तव शुक्रबार संघीय समाजवादी फोरममा प्रवेश गरेका छन् । ५० दिन अगाडि मात्र राष्ट्रिय जनता पार्टी (राजपा) परित्याग गरी विजय गच्छेदारको लोकतान्त्रिक फोरममा श्रीवास्तव प्रवेश गरेका थिए । वीरगन्ज महानगरपालिकाको मेयरमा राजपाले टिकट नदिएपछि लोकतान्त्रिक फोरमबाट चुनाव लडेका श्रीवास्तव लज्जाजनक पराजय भोगेका थिए । श्रीवास्तव निर्वाचन प्रेमी मानिएपनि हालसम्म कुनैपनि निर्वाचनमा उनले एउटै पार्टीबाट दोहोर्‍याएर लडेका छैनन् ।

पहिलो संविधानसभामा राप्रपा, दोस्रोमा तमलोपा र गत महिना भएको मेयरको चुनावमा उनी लोकतान्त्रिक फोरमबाट लडे । त्यसअघि उनी तीन पटक मेयर बन्दापनि फरक फरक पार्टी र समूहबाट निर्वाचित भएका थिए । शाहीकालमा उनी मनोनित मेयर भए । डेढ महिना अगाडिमात्र प्रवेश गरेको पार्टीका अध्यक्ष विजय गच्छेदार आफ्ना सहयोग सहित पुरानै पार्टीमा फर्किएपनि श्रीवास्तव भने गएनन् । 

त्यसताका उनी एमालेमा जाने तालमेल मिलाउँदै थिए । एमालेमा प्रवेश गर्न भनेर बुद्ध ऐयरको प्लेन चढेर काठमाडौँ पनि पुगे । त्यहा एमाले अध्यक्ष केपी ओलीसँग एक चरणको वार्ता पनि सम्पन्न भयो । त्यही दिन दिउँसो एमाले केन्द्रीय कार्यालयमा टिका लगाएर प्रवेश गर्ने कार्यक्रम पनि तय भयो । तर, हालै भएको वामगठबन्धनका कारण एमालेसँग सहकार्यमा रहेको माओवादी नेतृ उर्मिला आर्यालले श्रीवास्तवको प्रवेशमा ‘भिलेन’ को रोल–प्ले गरेको जानकार बताउँछन् । पर्सा क्षेत्र नम्बर माओवादीको भागमा परेकाले उनले श्रीवास्तवलाई एमालेमा प्रवेश गरे प्रतिनिधी सभा वा विधायकको टिकट दिन नसकिने अडान लिइन् ।

त्यसपछि कांग्रेसका नेताहरुले श्रीवास्तवलाई पार्टीमा भित्र्याउन कसरत थालेका थिए । पार्टी सभापति शेरबहादुर देउवासँग एक चरणको भेटघाट पनि भएको थियो । हालका लागि केही गर्न नसकेपनि अगामि दिनमा उचित स्थान दिने देउवाले आश्वासन दिएका थिए । श्रीवास्तवले आफूलाई केही नदिएपनि आफू निकट रहेका पुरुषोत्तम झालाई पर्सा क्षेत्र नम्बर एक को ‘ख’ बाट विधायकको टिकटको सुनिश्चितता चाहेका थिए । देउवाले त्यो विषय जिल्लास्तरबाट मिलाएर ल्याउनुस मलाई केही फरक पर्दैन् भनेर जवाफ फर्काएका थिए । तर, सोही क्षेत्रबाट कांग्रेसका क्षेत्रीय सभापति विजय सर्राफ पनि विधायकका आंकाक्षी हुन् । जिल्ला सभापति अजय द्धिवेदी निकट मानिएका सर्राफले उक्त सिट छोड्न नमानेपछि श्रीवास्तवको कांग्रेस प्रवेश हुन सकेन् । 

यही बीचमा संघीय समाजवादी फोरम पनि श्रीवास्तवलाई भित्र्याउने प्रयास जारी नै राखेको थियो । हालै सम्पन्न भएको स्थानीय तहको निर्वाचनमा पर्सा जिल्लामा सबैभन्दा बढी तहमा जीत हासिल गरेको फोरमले श्रीवास्तवलाई ल्याउन सके संघ र प्रदेशको निर्वाचनमा क्षेत्र नम्बर एक र दुई झन बलियो हुने आंकलन गरेको थियो । मधेसमा पार्टीको सिद्धान्त भन्दा पनि व्यक्तिको पछाडि कार्यकर्ता र जनता लाग्ने गरेका छन् । विगतका निर्वाचनको नतिजा हेर्दा वीरगन्ज महानगरपालिकामा श्रीवास्तवसँग ६/७ हजार मतदाता रहेका छन् ।

अहिलेको क्षेत्र नम्बर १ मा मात्र उनको साढे दुई हजार पकेटका मतदाता छन् । ती मतदाता श्रीवास्तव कुनै पार्टीमा गएपनि उनैलाई भोट हाल्छन् । तर, पछिल्लो समय श्रीवास्तवको महिने पिच्छे पार्टी परिवर्तनले उनका विश्वासपात्र कार्यकर्ता निराश बनेका छन् । केही युवा कार्यकर्ता श्रीवास्तवलाई छाडेर एमालेमा प्रवेश गरिसकेका छन् । कतिपय त फोरमको नेतृत्वसँग असन्तुष्ट छन् ।

अहिले हात हातमा मोबाइल र इनटरनेटको सहजताले जनता जागरुक बनिसकेका छन् । श्रीवास्तवको प्रवेशले फोरमलाई क्षणिक लाभ देखिएपनि अगामि मंसिर २१ गते मतपेटिकामा त्यो लाभ पुर्‍याउन सकसपूर्ण देखिन्छ ।