कलैया,८ चैत । 
नेपाल पत्रकार महासंघ बारा शाखाको हवला दिएर केही राष्ट्रिय तथा स्थानीय संचारमाध्याममा काठ तस्करी गर्न खोजिएको भन्ने भ्रामक समाचार प्रकाशित भएकोमा नेपाल पत्रकार महासंघ बारा शाखाले आफ्नो गम्भीर ध्यानाकर्षण भएको जनाएको छ । 
    मंगलबार नेपाल पत्रकार महासंघ बारा शाखाका अध्यक्ष कमल कुमार उपाध्यायले एक प्रेस बिज्ञप्ती जारी गर्दै पत्रकार महासंघ सबै पत्रकारहरुको आस्थाको संगठन भएपनि संगठनकै अस्तित्व सिध्याउने गरी संस्थाकै साधारण सदस्यहरुबाट समाचार लेख्ने र समाचार प्रकाशित गर्ने कार्य गरिदा पत्रकार महासंघ र बाराका पत्रकारहरुको ब्यवसायिक मर्यादामाथ ठूलो धावा बोल्ने कार्य भएको उल्लेख गरेका छन । बिभिन्न आरोह अवरोहहरु झेल्दै यही चैत १९ गते पत्रकार महासंघ बारा शाखाको छैठौं जिल्ला अधिवेशन गर्ने तयारीमा जुटिरहेको पूर्व संध्यामा निर्वाचनलाई समेत असर गर्ने गरी राजनीतिक प्रतिशोधको भावले यस्तो कार्य गर्न र गराउन लगाइएको हो अध्यक्ष उपाध्यायद्वारा जारी बिज्ञप्तीमा उल्लेख छ  । पत्रकार महासंघलाई जवरजस्ती कथित काठ तस्करीको बिल्ला भिराएर हामीले कस्तो खालको समाजको कल्पना गर्दैछौं भन्ने चिन्ता समेत बिज्ञप्ति मार्फत गरिएको छ ।   
    निर्वाचनमा पराजय हुने कुण्ठाका आधारमा निर्माणधिन भवनको आवश्यक फर्निचरका लागि ल्याउदै गरिएको काठलाई अनावश्यक कारण देखाइ पत्रकार महासंघको नाउ जोडेर काठको तस्करी गर्न खोजियो भन्नु बाराका सबै ब्यवसायिक र श्रमजीवी पत्रकारहरुको ब्यवसायिक मर्यादामाथि कुठाराघात गर्न खोजिको उपाध्यायले जारी गरेको बिज्ञप्तीमा भनिएको छ । नेपाल पत्रकार महासंघ बारा शाखाको २०७२ साल कात्तिक १६ गते बसेको कार्य समितिको बैठकले फर्निचर निर्माणका जिल्ला बन पैदवार आपूर्ति समितिसंग काठ माग गरेको कुरा निर्णय पुस्तिकामा सुरक्षित छ । बैठकमा उपाध्यक्ष राकेश पाण्डेय र सचिव जयनारायण यादव पनि उपस्थिति रहेको हुंदा उहाहरुले महासंघको निर्णय बिपरित बोल्नु ठिक नभएको बिज्ञप्तीमा उल्लेख छ । जिल्ला आपूर्ति समितिले नै निर्णय गराएर महासंघलाई काठ उपलब्ध गराइदिनु भनेको र सातदिनभित्र काठ नउठाए काठ जफत हुने जिल्ला वन कार्यालयले पटक पटक भनेपछि महासंघ काठ उठाउन अहिले बाध्य भएको कुरा सबैमा स्पष्ट पार्न चाहन्छु उपाध्यायद्वारा जारी बिज्ञप्तीमा उल्लेख छ । महासंघलाई उपलब्ध गराएको काठ पत्रकार महासंघको कलैया स्थित भवनमा सुरक्षित रहेको कुरा भन्दै उनले बिज्ञप्ती मार्फत  फेरिपनि पत्रकार महासंघ बाराको अध्यक्षको नाताले जिल्लाका सबै पत्रकारहरुलाई संयमित भइ मुल्यनिष्ठ पत्रकारितामा जोड दिन आग्रह गर्दै पत्रकारिताको नाउमा आफ्नो खुट्टामा आफै बञ्चरो हान्ने कार्यमा संलग्न नहुन पनि सबैलाई अपिल गरेका छन ।