रानीघाटका चामल गोदाममा प्रहरीको छापा १३ लाख बढीको चामल बरामद

इसीमाना सम्वाददाता २०७९ पौष २० गते ०८: २१ मा प्रकाशित 411 पटक पढिएको

भंसार छली गरेर ल्याइएको चामल भण्डारण गरिएको गोदाममा पर्सा प्रहरीले छापामारी गरि सैयौ बोरा चामल बरामद गरेको छ ।

पर्सा प्रहरी वडा प्रहरी कार्यालय बिर्ता र श्रीपुरको संयुक्त टोलीले वीरगंज महानगरको वडा –११ को रानीघाटमा रहेको चामल गोदाममा छापामारी गरेको हो । छापामारीबाट प्रहरीले साढे १३ लाख मूल्य बराबरको चामल बरामद गरेको छ ।

खाद्यान्न व्यापारीहरु देवशरण साह, कृष्ण साह र नेपाली बाबु भनिने सुनिल साहको गोदाममा प्रहरीले छापा मारेको हो । ती गोदामबाट भन्सार छली गरे ल्याईएका २० र २४ किलो दरका ९ सय १९ बोरा चामल बरामद गरेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक दिपक गिरीले जानकारी दिए ।

देवशरणको गोदामबाट ३ सय ६५, कृष्णको गोदामबाट १ सय ३६ र सुनिलको गोदामबाट ४ सय २७ बोरा चामल बरामद गरिएको उहाँले बताउनुभयो ।

खुला सीमाको दुरुपयोग गर्दै व्यापारीहरुले साइकल, मोटरसाइकलमा थोरै–थोरै परिमाणमा सिमावर्ती भारतीय बजार रक्सौलबाट खाद्यान्न लगायतका सामग्री दिनहुँ भित्राउने गरेका छन् ।

नेपालमा भन्दा कम मूल्यमा भारतीय बजारमा पाइने खाद्यान्न, लत्ता कपडा, औषधीजन्य सामग्री, इलेक्ट्रिक सामान, मोटरका पाटपुर्जाहरु भन्सार छलेर भित्राउने गरिन्छ । तस्करीको माध्यमबाट सामान ल्याउँदा भन्सार राजश्व पनि छलिने हुँदा व्यापारीले ती सामान बिक्रीबाट बढी मुनाफा आर्जन गर्छन् ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।