बीरगंज १० माघ ।

पर्सा, बारा र मकवानपुर तीन जिल्लाको सीमाक्षेत्रमा रहेको पर्सा राष्ट्रिय निकुञ्ज नेपालको सबैभन्दा कान्छो निकुञ्ज हो । पहिले वन्यजन्तु आरक्षको रुपमा मात्रै रहेको आरक्ष क्षेत्र अहिले राष्ट्रिय निकुञ्जमा परिणत भएको छ ।

प्रदेश नम्बर २ मा पर्यटकका लागि पर्सा राष्ट्रिय निकुञ्ज आकर्षक गन्तव्य स्थलका रुपमा विकसित हुँदै गएको हो । नेपालमा पाइने रैथाने हात्तीको वासस्थान संरक्षण गर्ने उदेश्यले विक्रम संवत २०४० सालमा बारा, पर्सा र मकवानुपुरसँग सीमा जोडिएको चार सय ९९ वर्ग किलो मिटर जंगल क्षेत्रलाइ पर्सा वन्यजन्तु आरक्षको रुपमा स्थापना गरिएको थियो । २०७२ सालमा भने बारा तर्फको एक सय २८ दशमलव ३९ वर्ग किलो मिटर राष्ट्रिय वन क्षेत्रलाइ पनि तत्कालीन पर्सा वन्य जन्तु आरक्षमा समाहित गरेपछि अहिले यसको कुल क्षेत्रफल ६ सय २७ दशमलव ३९ वर्ग किलोमिटर छ ।

       तत्कलीन पर्सा वन्य जन्तु आरक्षलाइ २०७४ साल बैशाख २५ गतेको नेपाल सरकार मन्त्रिपरिषदको बैठकले पर्सा राष्ट्रिय निकुन्जका रुपमा परिणत गर्ने निर्णय गरेको हो । राष्ट्रिय निकुन्जमा परिणत भएपछि स्वदेशी तथा विदेशी पर्यटकहरुलाइ अवलोकन र घुमफिरका लागि खुल्ला गरिएको छ ।

यो संगै निकुन्ज आसपासमा करोडौँ रुपैयाँको लगानीमा नयाँ रिसोर्ट तथा होटल निर्माण हुने क्रममा रहेको छ । छ सय २७ वर्ग किमीमा फैलिएको यो निकुञ्जलाई रौतहटसम्म निकुञ्ज विस्तारको माग भइरहेकोे पर्सा राष्ट्रिय निकुञ्जले जनाएको छ । पर्यटनको लागि पूर्वाधारहरुको पनि आवश्यकता हुने भएकोले अहिले निकुञ्ज वरिपरि आन्तरिक तथा बाह्य पर्यटकलाई लक्षित गरी साना होटल देखि ठूला र सुविधा सम्पन्न होटल तथा रिसोर्टहरु पनि खुल्न थालेको छ ।

 निकुञ्जभित्र रहेका ऐतिहासिक तथा प्राचीन हलखोरियादह, कामिनी दह, माया मन्दिर, दूग्धेश्वर महादेव मन्दिरका साथै निकुञ्जभित्र पर्यटकका लागि निश्चित शुल्क लिएर पर्सा राष्ट्रिय निकुन्ज भित्र रहेका विभिन्न महत्वपूर्ण तथा दुर्लभ वन्यजन्तु र चराचुरुङ्गीहरु अवलोकन गर्नका लागि खुला गरिएको छ । 

पर्सा राष्ट्रिय निकुन्जमा प्रवेशका लागि नेपाली पर्यटकको हकमा ५० रुपैंया , सार्क मुलुकका पर्यटकका लागि पाँच सय रुपैंयामा १३ प्रतिशत भ्याट थप तथा अन्य मुलुकका पर्यटकका लागि एक हजार रुपैयामा भ्याट थप गरी शुल्क निर्धारण गरिएको निकुन्जका प्रमुख संरक्षण अधिकृत हरिभद्र आचार्यले जानकारी दिए । पर्सा राष्ट्रिय निकुन्जमा दुर्लभ वन्यजन्तुहरु पाटे बाघ , रैथाने हात्ती , एक सिङगे गैडा , भालु , रतुवा मृग , चित्तल ,जरायो , बँदेल , नील गाइ , गौरी गाइका साथै झण्डै दुइ सय प्रजातिका चराचुरुङगीहरु छन् । 

पर्यटकहरुको अवलोकन र घुमफिरका लागि निकुन्जको जंगल भित्र पर्ने मकवानपुरको प्रतापुर , पर्साको रातोटे र रामभौरी भाथा, बाराको हलखोरीयामा गरि एक दर्जन भ्यु टावरहरु पनि बनाइएको छ ।

यसैगरि पर्यटकहरुलाइ जङगल सफारी गर्न निकुन्जको हात्तीसारमा एक दर्जन हात्तीहरु पनि राखिएको छ । निकुन्ज भित्र फायर लाइन पनि भएकाले हात्तीको जंगल सफारी गर्न नचाहने पर्यटकहरुले आफनो नीजी सवारीमा सवार भइ जंगल सफारी गर्न सक्ने व्यवस्था पनि मिलाइएको प्रमुख संरक्षण अधिकृत आचार्यले बताए ।