लुट मच्चाउनेहरुलाई कारवाही गरेर उपभोक्तालाई सरकार भएको अनुभूती दिलाउन मंचको अपिल

4/27/2020 गते 00 00 मा प्रकाशित 1046 पटक पढिएको

बीरगंज १५ बैशाख ।

उपभोक्ता हित संरक्षण मंच प्रदेश २ ले उपभोक्तालाई लुटने प्रवृति देखिएको प्रति गम्भिर ध्यानाकर्षण भएको जनाएको छ ।

मंचको आज सोमवार भएको भर्चुअल बैठक पछि अध्यक्ष के.सी.लामिछानेले जारी गर्नु भएको प्रेस नोटमा संकटको यो घडीमा उपभोक्ता लुट्ने प्रवृति कतिपय ठाउमा देखा परेको भन्दै चिन्ता समेत ब्यक्त गरिएको छ ।

बीरगंज पथलैया औधोगिक करिडरका खाद्य उधोगका संचालकको गिरफ्तारी,कलैया उपमहानगरपालिकाका प्रमुख सहित केही जनप्रतिनिधि र ब्यवसायीको गिर्फतारीले उपभोक्तालाई कति सम्म लुटन खोजिको कुरा प्रष्ट भएको उल्लेख छ ।

ब्यवसायीहरुको पेशागत हितकालागि बनेको ब्यपारीको संघले राज्यको उपस्थितिलाई चुनौती दिदै खाद्य समाग्रीको मूल्य तोक्ने र खुल्लम खुला कालो बजारी गर्ने काम भइरहेको छ । राहत बितरणमा समेत दलीय आग्रहका कारण वास्तविक ब्यक्तिहरु बन्चित भएका र त्यसैकालागि झडप समेत भएका घटनाहरु सार्वजनीक भएको प्रति उपभोक्ता हित संरक्षण मंच प्रदेश २ को गम्भिर ध्यानाकर्षण भएको प्रेस नोटमा उल्लेख छ ।

मंचले कोरोना भाइरसको महामारीलाई नियन्त्रण गर्न चिकित्सक स्वास्थ्यकर्मी , सुरक्षाकर्मी र संचार जगत पहिलो पंक्तिमा रहेर लडाईको मोर्चा सम्हालिरहनु भएको भन्दै उहाँहरुको योगदानप्रति उच्च सम्मान प्रकट गरेको छ ।

मंचले कोरोना बिरुद्धको लकडाउनलाई सफल बनाउन नागरिक दायित्व महत्पूर्ण रहेको स्मरण गर्दै अनेकौ कठिनाईका बाबजुद यसलाई पालना गर्न सम्पूर्ण उपभोक्तालाई हार्दिक अपिल गर्दछौ भनेको छ ।

मंचले मानव समुदायमाथि आइपरेको बैश्विक महामारीमा कालो बजारी र लुट मच्चाउने अनुचित क्रियाकलापमा संलग्नहरुलाई कानूनी दायरामा ल्याएर कारवाही गर्न र प्रदेशमा सरकार र स्थीय सरकार भएको अनुभूती गराउन प्रदेश तथा स्थानीय सरकारको ध्यानाकर्षण गराउदछौ भनिएको छ ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।