बीरगंज ३० चैत । 

तीन जना भारतीय नागरिकमा कोराना भाइरसको संक्रमण देखिएपछि उनीहरुले आश्रय लिदै आएको बीरगंजको छपकैया क्षेत्रलाई शिल गरिएको छ ।

बीरगंज महानगरपालिकाको वडा नं २ छपकैयाको यतिम खाना र घुसुकपुरमा रहेको  मस्जिदमा उनीहरुले आश्रय लिएका थिए ।

मुस्लिम समुदायमा धर्म प्रचार गर्न हिड्ने समुहलाई जमाती भनिन्छ । जमातीको समुहमा रहेका धर्म प्रचारहरुले नमाज पढने तरिकाहरु सिकाउने गर्दछन । उनीहरुमा कोरोना भाइरसको संक्रमण पाइएपछि बीरगंज र यस आसपासको क्षेत्रमा चिन्ता बढेको छ । 

नेपाल प्रहरी शसस्त्र प्रहरी र नेपाली सेनाको समेत संलग्न रहेको टोलीले छपकैया क्षेत्रमा अध्ययन गरि छपकैया क्षेत्रलाई शिल गरेको छ । त्यो क्षेत्रमा जमातीहरुसंगको सम्बन्ध सम्र्पकका बिषयमा गहन खोजी शुरु गरेको छ । मस्जिदमा  आएकाहरुको ट्राभल्स हिस्ट्रीका बारेमा पनि अनुसन्धान शुरु गरिएको स्थानीय प्रशासनले जनाएको छ । 

यसैवीच बीरगंजमा कोभिड अस्पताल संचालनका बिषयमा सरोकारवालावीच छलफल भइरहेको छ । बीरगंजमा कोरोना भाइरसको सक्रमण देखा परेपछि चिकित्सकहरुले पनि छुट्टै अस्पताल संचालनकोलागि  सुझाव दिएका छन । नारयणी अस्पताललाई नै कोभिड अस्पतालको रुपमा बिकास गर्ने सम्मको छलफल भएको तर निष्कर्षमा नपुगिएका एक जना सहभागिले जनाएका छन ।

 जनरल र कोभिड–१९ का बिरामीलाई एकै ठाउँमा राखेर उपचार गर्दा समस्या आउन सक्ने प्रति चिकित्सकहरुले सजग गराएका छन  । नारयाणी अस्पतालका मेडिकल सुपरिटेन्डेन्ट डा. मदन उपाध्यायले छिटो भन्दा छिटो कोरोना विशेष अस्पताल सञ्चालन गर्नुपर्ने बताउनु भयो ।

प्रदेशले निर्णय गरेको कोभिड अस्पताल छिटो भन्दा छिटो सञ्चालन गर्नुपर्छ । त्यसो गर्न नसके स्थानीय प्रशासनले कुनै अस्पताललाई खाली गराएर पनि कोभिड अस्पताल बनाउनुपर्ने उहााको धारणा रहेको छ ।

कोरोना संक्रमित तीन जना भारतीय हाल नारायणी अस्पतालको आइसोलेसन वार्डमा उपचाररत छन् ।

तीनजना भारतीय जमातीलाई कोरोना संक्रमण भएको पुष्टि हुनासाथ वीरगञ्जमा सरोकारवाला निकाय ले सक्रियता देखाएका छ। जमातीमा रहेकाहरुको कन्टयाक्ट ट्रेसिङमा  स्थानीय प्रशासनले ध्यान केन्द्रित गरेको जनाएको छ । 

कोरोनाले छपकैया क्षेत्रमा समुदाय नै प्रभावित हुन सक्नेतर्फ ध्यान दिँदै आसपासको ठाउँ शील गर्ने र छिटोभन्दा छिटो स्क्रिनिङ र टेष्ट गर्नुपर्ने नारायणी अस्पतालका  चिकित्सक डा . उदयनारायण सिंह को भनाई छ  । 

नारायणी अस्पतालमा एउटा मात्रै भेन्टिलेटर छ । चारवटा आईसीयूको प्रबन्ध छ भने आइसोलेसन वार्ड २५ बेडको छ । नारायणी अस्पतालमा ३ सय थान र्‍यापिड टेष्ट किट आएको छ, जिल्ला जनस्वास्थ्य कार्यालय र नेशनल मेडिकल कलेजलाई १ र १ सय थान र्‍यापिड टेष्ट किट प्रदान गरिएको छ ।