एसिड प्रहार घटनाका दोषीको कारवाही सम्बन्धमा सांसद यादवको चासो

10/14/2019 गते 00 00 मा प्रकाशित 1044 पटक पढिएको

वीरगन्ज, २७ असोज । पर्सा क्षेत्र नम्बर १ का सांसद प्रदिप यादवले वीरगन्जकी मुस्कान खातुनमाथि एसिड प्रहार गर्ने व्यक्तिहरुको कारवाही सम्बन्धमा चासो देखाएका छन् ।

भदौ २० गते वीरगन्जको विर्तामा १५ बर्षीया मुस्कान खातुन माथि दुईजना युवकले एसिड प्रहार गरि घाईते बनाएका थिए ।

मुस्कानको अहिले काठमाडौंमा उपचार भईरहेको छ । उपचाररत मुस्कानलाई भेट्न सबैजना गएर सामाजिक सञ्जालमा छाउने गरेपनि उनलाई एसिड प्रहार गर्ने दोषीहरुको कारवाहीको बारेमा भने कसैले चासो नदेखाएपछि आफै जिल्ला प्रहरी कार्यालय पर्सामा पुगेर सांसद यादवले पर्साका प्रहरी उपरीक्षक सोमेन्द्र सिंह राठौरलाई भेटेर घटनाको दोषीहरुको कारवाहीको बारेमा चासो लिएका हुन् ।

उनले प्रहरी हिरासतमा रहेका घटनामा दोषीलाई कडा भन्दा कडा कारवाही गर्नुपर्ने भन्दै अस्पतालको प्रारम्भिक स्वास्थ्य जाँचको रिपोर्ट भन्दा पनि पछिल्लो अवस्थाको मुस्कानको स्वास्थ्य रिपोर्टलाई प्रमाणको रुपमा पेश गरेर न्याय दिलाउन माग गरेका छन् ।

मुस्कान खातुनको अस्पतालमा उपचार हुदै गरेको भएपनि उनको जीवनमा एउटा अत्यन्तै दुखद पीडामा बाँच्नु पर्ने अवस्था रहेकोले तत्काल पीडितलाई न्याय हुने गरि कारवाही अगाडि बढाउन प्रहरी उपरीक्षक सोमेन्द्र सिंह राठौरलाई सांसद निर्देशन दिए ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।