वीरगन्ज । चिसो झन् बढ्दै जानुका साथै शीतलहर पनि कम नहुँदा वीरगन्ज महानगरपालिकाले विद्यालयहरूमा थप तीन दिन जाडो बिदा थपेको छ।
बढ्दो चिसो मौसमलाई मध्यनजर गर्दै महानगरपालिकाले पुस १६ गतेदेखि १८ गतेसम्म महानगरभित्रका सबै सामुदायिक तथा संस्थागत विद्यालयहरूमा बिदा दिने निर्णय गरेको शैक्षिक प्रशासन महाशाखा प्रमुख आनन्द लामिछानेद्वारा जारी सूचनामा उल्लेख छ।
चिसोका कारण बालबालिकाको स्वास्थ्यमा पर्न सक्ने प्रतिकूल असरलाई ध्यानमा राखी उक्त बिदा वर्षे बिदाबाट कट्टा हुने गरी दिइएको सूचनामा उल्लेख छ।
पुस १९ गते शनिबार परेकाले अब पुस २० गतेदेखि मात्रै विद्यालयहरूमा नियमित पठनपाठन सुचारु हुने शैक्षिक प्रशासन महाशाखाले जनाएको छ।
यसअघि पनि वीरगन्ज महानगरपालिकाले चिसोका कारण पुस १३ र १४ गते तथा त्यसअघि पुस ७ देखि ९ गतेसम्म विद्यालयहरूमा जाडो बिदा दिएको थियो।
तराई–मधेस क्षेत्रमा पुस महिना सुरु भएदेखि नै चिसो बढ्दै गएको छ। जसका कारण जनजीवन प्रभावित भएको छ। हुस्सु लाग्नुका साथै चिसो हावा चल्न थालेपछि विशेषगरी वृद्धवृद्धा, बालबालिका तथा दैनिक ज्याला मजदुरीमा काम गर्नेहरू बढी प्रभावित भएका छन्।

तपाईको प्रतिक्रिया