बीरगंज महानगरले संचालनमा ल्यायो अस्थायी कोभिड अस्पताल तथा आइसोलेशन सेन्टर

5/7/2021 गते 00 00 मा प्रकाशित 667 पटक पढिएको

वीरगन्ज महानगरपालिकाले एक सय शय्या क्षमताको अस्थायी कोभिड अस्पताल र एक सय शय्याको आइसोलेसन सेन्टर बैशाख २४ गतेदेखी सञ्चालनमा ल्याएको छ ।

वीरगन्ज महानगरपालिका १० घडिअर्वास्थित गोपाल मण्डली धर्मशालामा बनाइएको आइसोलेसन सेन्टर र कोभिड अस्पताल मेयर विजयकुमार सरावगीले उद्घाटन गर्नु भयो।

केही दिन अगाडि मात्र संक्रमित भइ होम आइसोलेसनमा रहनुभएकी वीरगन्ज महानगरपालिकाकी उपमेयर शान्ति कार्की अस्थायी कोभिड अस्पतालमा पहिलो बिरामीको रुपमा भर्ना हुनु भएको छ। अस्पतालमा बिरामी भरिएकाले महानगरपालिकाले शुक्रबारदेखि अस्थायी कोभिड अस्पताल र आइसोलेसन सेन्टर सञ्चालनमा ल्याएको मेयर विजयकुमार सरावगीले बताउनु भयो ।

अस्थायी अस्पतालमा चिकित्सकसहित प्यारामेडिकल स्टाफ समेत रोखर संक्रमितको उपचार गरिने छ । कोभिड अस्पतालमा संक्रमितको उपचारका लागि एकजना विशेषज्ञ चिकित्सक, एमडी गरेका दुई जना चिकित्सक, मेडिकल अधिकृत ५ जना, २१ जना प्यारामेडिकल स्टाफ, ८ जना सरसफाइकर्मी र १० जना प्रशासनिक कर्मचारी खटाइएको छ ।

कोभिड अस्थायी अस्पतालमा अक्सिजन सहितको वेडको व्यवस्था गरिएको छ । होम आइसोलेशनमा बसेर अक्सिजन प्रयोग गरेका बिरामीहरुकोलागि पनि चिकित्सकको निगरानीमा उपचारको आवश्यकता रहेकोले उनीहरुलाई समेत अस्थायी कोभिड अस्पतालमा उपचार दिने गरि ब्यवस्थापन गरिएको महानगरप्रमुख सरावगीले बताउनु भयो ।

कोभिड अस्पतालमा उपचारार्थ भर्ना भएका संक्रमितलाई अक्सिजन, औषधि र खाजा, खाना समेत महानगरपालिकाले निशुल्क रुपमा उपलब्ध गराउने उहाँले जानकारी दिनुभयो ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।