प्रदेश २ का मुख्यमन्त्री लालबाबु राउत गद्दीले कोरोना खोपले कोरोनाविरुद्ध लड्नका लागि थप साहस मिलेको बताउनु भएको छ । कोरोना बिरुद्धको खोप अभियानको बीरगंजमा शुभारम्भ गर्दै मुख्यमंत्री  राउतले यस्तो बताउनु भएको हो । उहाँले सरोरकारवाला सबैको सहयोगमा प्रदेशमा कोरोना भाइरसको संक्रमणलाई नियन्त्रण गर्नसकिएको बताउनु भयो । 

वीरगञ्जको नारायणी अस्पतालमा कोरोनाविरुद्धको खोप अभियानको शुभारम्भ गर्दै मुख्यमंत्री राउतले कोरोना महामारी रोकथाम तथा नियन्त्रणमा स्वास्थ्यकर्मीले सुरक्षकर्मी सफाईकर्मी तथा संचारकर्मीले प्रर्दशन गरेको हिम्मतको प्रशंसा गर्नु भयो ।

 पहिलो चरणमा स्वास्थ्य तथा सफाईकर्मीलाई खोप लगाइने प्रदेश स्वास्थ्य निर्देशनलायका निर्देशक बिजय झाले जानकारी दिनु भयो । 

कोभिड–१९ विरुद्धको खोप अभियानको प्रदेश नं २ का ८ वटै जिल्लामा एकैसाथ सुरुवात गरिएको छ । पर्सामा नारायणी अस्पताल वीरगञ्ज, बारामा कलैया अस्पताल, रौतहटको गौर अस्पताल,सर्लाहीको मलंगवा अस्पताल, महोत्तरीको जलेश्वर अस्पताल, जनकपुरको प्रादेशिक अस्पताल, सिराहाको सिराहा अस्पताल, सप्तरीको गजेन्द्र नारायण सिंह अस्पताल र रुपनीस्थित प्रहरी प्रादेशिक अस्पतालमा गरी ९ वटा अस्पतालमा खोप अभियान सुरु गरिएको हो । ५ दिनभित्र सबै फ्रन्टलाइनरलाई खोप लगाइसक्ने योजना छ ।

संघीय सरकारले प्रदेश २ मा ३४ हजार ८ सय ४ थान खोप पठाएको छ । पर्सामा ४ हजार ९ सय ७१, बारामा २ हजार ३ सय ९५, रौतहटमा ३ हजार ६ सय ९, सर्लाहीमा ४ हजार ७ सय ७२, महोत्तरीमा २ हजार १ सय ९१, धनुषामा ९ हजार १ सय ८२, सिराहामा ३ हजार ९ सय ३० र सप्तरीमा ३ हजार ७ सय ७५ थान खोप पठाईएको खोप अभियानका प्रदेश २ संयोजक डा। मदन उपाध्यायले जानकारी दिए ।

प्रदेश  २ मा पहिलो पटक ०७६ चैतको अन्तिममा कोरोना संक्रमित फेला परेका थिए  । उनीहरुको उपचार नारायणी अस्पतालमा भएको थियो । उनीहरुको उपचारमा संलग्न अस्पतालमा कार्यरत स्टाफ नर्स  अहेमा थापालाई खोप लगाएर खोप अभियानको शुभारम्भ गरिएको हो ।

प्रधानमन्त्री केपी शर्मा ओलीले बुधबार काठमाडौँस्थित टेकु अस्पतालमा खोप अभियान कार्यक्रमको शुभारम्भ गरेपछि देशभारी पहिलो चरणमा फ्रन्टलाईनमा खटेका स्वास्थ्यकर्मीहरुलाई खोप दिन थालिएको हो । 

खोप अभियान कार्यक्रम अन्तर्गत प्रदेश नम्बर २ मा पनि एकजना स्वास्थ्यकर्मीलाई खोप लगाएर खोप अभियानको सुरुवात गरिएको छ ।

नारायणी अस्पतालले आज पहिलो दिन एक सय जनाभन्दा बढीलाई खोप लगाउँने लक्ष्य बनाएको मेसु डा. संजय ठाकुरले बताउनु भयो । 
कार्यक्रममा  पर्साका प्रमुख जिल्ला अधिकारी आस्मान तामाङ, वीरगञ्जस्थित भारतीय महावाणिज्य दुतावासका महावाणिज्य दुत नितिश कुमारलगायतको उपस्थिति रहेको थियो ।

वीरगञ्जमा खोप कार्यक्रमको उद्घाटन भएसँगै प्रदेश नम्बर २ का अन्य जिल्लाहरुमा पनि खोप लगाउँन सुरु गरिएको छ । नेपाललाई भारतले गत बिहीवार १० लाख डोज अनुदानमा खोप उपलब्ध गराएको थियो ।