सुपौलीका ६८ वर्षिय बृद्धमा मृत्यु पछि कोरोना भाइरसको संक्रमण पुष्टि

8/25/2020 गते 00 00 मा प्रकाशित 823 पटक पढिएको

वीरगञ्जस्थित नारायणी अस्पतालको मातहातमा रहेको अस्थायी कोभिड विशेष अस्पताल गण्डकमा उपचारका क्रममा मृत्यु भएका ब्यक्तिमा कोरोना भाइरसको संक्रमण पुष्टि भएको छ ।

जिराभवानी गाउँपालिका वडा नं ४ सुपौली निवासी ६८ वर्षीय पुरुषको आइतबार राति १० बजे मृत्यु भएको थियो । सोही दिन तराई हस्पिटलबाट रिफर गरी ल्याइएको केहिबेरमै वृद्धले ज्यान गुमाएको कोभिड अस्पतालका संयोजक डा. उदयनारायण सिंहले जानकारी दिनु भयो । सोही दिन उहाँको कोरोना भाइरसको संक्रमण परिक्षणकोलागि स्वाब संकलन गरिएको थियो ।

हिजो बेलुका आएको रिपोर्ट अनुसार उहाँमा कोरोना भाइरसको संक्रमण रहेको जिल्ला प्रशासन कार्यालय पर्साका प्रशासकीय अधिकृत बिनय श्रीवास्तवले जानकारी दिनु भएको छ ।

मुटुसम्बन्धी समस्याका कारण तराई अस्पतालमा उपचारका शनिवार साँझ ६ बजे तिर तराई अस्पतालमा भर्ना हुनु भएका वृद्धमा कोरोनासँग मिल्दोजुल्दो लक्षण देखिएपछि उहाँलाई आइतबार राति साढे ९ बजे गण्डक कोभिड अस्पतालमा भर्ना गरिएको थियो ।

एक्स–रे गरेर हेर्दा दुईवटै फोक्सोमा निमोनिया देखिएको तराई अस्पतालले जनाएको छ । अक्सिजन दिँदा पनि अक्सिजन लेभलमा सुधार नआएपछि उहाँलाई कोभिड अस्पतालमा रेफर गरिएको थियो । निमोनिया ,खोकी मुटु सम्बन्धी समस्यासंग जुधिरहनु भएका उहाँको कुनै ट्राभल्स हिस्ट्री भने देखिदैन ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।