संक्रमण नियन्त्रणको अभियानमा पटेर्वा सुगौलीको २५ लाख योगदान,प्रकोप बिरुद्ध हातेमालो गरेका हौः चौधरी

6/2/2020 गते 00 00 मा प्रकाशित 1718 पटक पढिएको

वीरगंज महानगरपालिकाले कोरोना भाइरस विरुद्धको लडाईमा आब्हान गरेको प्रकोप ब्यवस्थापन कोषमा आज पटेर्वासुगौली गाउँ पालिकाले २५ लाख उपलब्ध गराएको छ ।

पटेर्वासुगौली गाउँ पालिकाका अध्यक्ष हरिवावु चौधरीले कोभिड विरुद्ध वीरगंज महानगरपालिकाले चालेको कदममा हातेमालो गर्न २५ लाख रुपियाँको चेक वीरगंज महानगरपालिकाका प्रमुख विजय कुमार सरावगीलाई हस्तान्तरण गर्नु भयो ।

गत जेठ ६ गते वीरगंजको नगरसभागृहमा पर्साका प्रमुख राजनीतिक दलका नेतृत्व, १४ वटा पालिकाका प्रमुख र प्रदेश सभा सदस्यहरुको उपस्थितिमा भएको बैठकले पर्साका सवै पालिकाबाट ५ करोड र उद्योग वाणिज्य संघ लगाएत उद्योगी ब्यवसायीबाट ५ करोड गरी जम्मा १० करोडको प्रकोप कोष स्थापना गर्ने निर्णय भए अनुसार नै पटेर्वासुगौला गाउँ पालिकाले २५ लाख उपलब्ध गराएको गाउँपालिकाका अध्यक्ष हरिवावु चौधरीले वताउनु भयो ।

वीरगंज महानगरपालिकाले पिसिआर मेशिन, भिटिएम किट, रिएजेन्ट किट, प्रिआइसोलेशन र कोभिड अस्पताल संचालनको लागि पर्सामा भएका सम्पूर्ण पालिका र विभिन्न संघ संस्थासँग सहयोगको अपिल गरेको थियो ।

आजै महाविर मन्दीर समितिको तर्फबाट एक लाख एघार हजार , ग्लोवल आइएमई बैंक वीरगंज शाखाको तर्फबाट एक लाख, पिसि मिडिया नेटर्वक (रेडियो सान्भी) को तर्फबाट २५ हजार नगद, राजेश पाण्डेयबाट ५ हजार एक सय, राजेश्वर पाण्डेबाट ४ हजार पाँच हजार र अनिल वरनवालबाट ५ हजार दुई सय पचास प्रकोप कोषमा जम्मा गर्ने गरी नगर प्रमुख विजय कुमार सरावगीलाई हस्तान्तरण गर्नु भएको छ ।

उक्त कोषमा वीरगंज महानगरपालिकाले एक करोड जम्मा गरी सकेको छ भने हाल सम्म उक्त कोषमा एक करोड ५६ लाख ७५ हजार जम्मा भैसकेको छ ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।