स्थानीय सरकारको पहलमा कोभिड अस्पताल संचालनमा ल्याउन सफल वीरगन्ज महानगरपालिकाले कोरोना परीक्षण गर्ने पीसीआर मेशिन खरिदको तयारी शुरु गरेको छ ।

कोरोना भाईरस कोभिड—१९ को उच्च जोखिममा रहेको वीरगन्ज महानगरपालिकाले अस्पताल संचालनमा ल्याएपछि महानगरवासीलाई सुरक्षित राख्न पीसीआर मेशिन पनि स्थानीय सरकारको तर्फबाटै खरिद गर्ने तयारी गरेको हो ।

मेशिन सहित किट खरिदकालागि अभियान शुरु गरेको वीरगन्ज महानगरपालिकाले सहयोगकालागि सबैसंग अपिल गरेको छ । महानगर प्रमुख बिजय कुमार सरावगीले कोरोना संक्रमणको अवस्थालाई दृष्टिगत गरि त्यसलाई नियन्त्रण गर्न प्रभावकारी कदम चाल्न आवश्यक रहेको बताउनु भयो ।

उहाले त्यसकोलागि अव अरुको मुख ताक्ने होयन आफैले काम गर्ने बताउनु भयो । करिब डेढ महिनादेखिको प्रयासमा गण्डक अस्पताललाई कोरोना  विशेष अस्पतालको रुपमा संचालनमा ल्याउन सफल भएपछि महानगरपालकाले पीसीआर मेशिन खरिद गर्ने तयारी गर्न लागेको हो ।

नारायाणी अस्पतालमा ७१ जना र २५ जनाको सिद्धार्थ माध्यामिक विद्यालयमा बनाईएको सेमी आईशोलेसनमा उपचार भईरहेकोमा गण्डक अस्पताललाई नारायणी अस्पतालकै इकाईको रुपमा कोरोना अस्पताल बनाएपछि अहिले सिद्धार्थ माध्यामिक विद्यालयमा रहेका २४ जनालाई गण्डकमा बिहीबार सारिएको छ ।

लामो राजनीतिक लडाईपछि वीरगन्ज महानगरपालिकाले केन्द्र सरकारसँग पहल गरेर गण्डक अस्पताललाई कोभिड अस्पतालको रुपमा संचालनमा ल्याउन सफल भएको हो । गण्डक हस्पिटलका संचालक एवं नेकपाका महानगरअध्यक्ष रहबर अन्सारीले कोभिड अस्पताल बनाउन निःशुल्क दिने घोषणा गरेपछि शुरु भएको राजनीति अन्तत पूर्णविराम लागेको छ ।

सरकारी प्रकृयाको झण्झट, आफनै पार्टीको नेतृत्वमा रहेको प्रदेश सरकारको अवरोध तथा व्यक्तिगत राजनीतिक प्रतिशधका कारण उत्पन्न खिचलो तथा विभिन्न आलोचना र टिकाटिप्पणीकाबीच पनि कोभिड अस्पताल स्थापना गर्न निरन्तर लागि रहेका वीरगन्ज महानगरपालिकाका मेयर विजय  कुमार सरावगीलाई जिल्लाका राजनीतिक दल, नेकपाका नेताहरु र स्थानीयको समर्थनले कोभिड अस्पताल स्थापनामा सफलता प्राप्त भएको हो  ।

अस्पताल स्थापनामा अहोरात्र खटेका मेयर सवारवगीलाई आफनै  दलका नेता र कार्यकर्ताहरुले पनि कडा अलोचना गरेर विभिन्न आरोप समेत लगाएका थिए ।

तर, उहाँ  ती आरोप  र आलोचनाको पछि नलागि वीरगन्ज महानगरपालिकालाई कोरोना भाईरस कोभिड १९ बाट कसरी बचाउन सकिन्छ भन्नेतर्फमात्रै निरन्तर लागिरहनु भयो  ।

वीरगन्ज महानगरपालिकाका कर्मचारी, नारायणी अस्पतालका चिकित्सक तथा स्वास्थ्यकर्मीहरुको पनि उहाँलाई भरपुर सहयोग र साथ रह्यो । उहाँ कोभिड अस्पताल स्थापना गर्ने लडाईमा अग्रपंक्तिमा रहनु भयो  ।

गण्डक अस्पताललाई कोभिड अस्पताल स्थापना गरी संचालनमा ल्याएपछि अब वीरगन्ज महानगरपालिकाले आफ्नै छुट्टै पीसीआर मेशिन खरिद गर्ने तयारीमा रहेको मेयर सरावगीले बताउनु भयो  । उहँले बिहिबार नै सामाजिक सञ्जाल फेसबुकमा पीसीआर मेशिन र किट खरिदको तयारी गरेको भन्दै सहयोगका लागि अनुरोध गर्नु भएको थियो  ।

पीसीआर मेशिन खरिदका लागि छलफल भईरहेको र एकदुई दिनमै बोलबत्र समेत आह्वान गरिने उहाँले बताउनु भयो  । मेयर सरावगीले भन्नु भयो , “मैले शुरुमै भनेको थिए  वीरगन्जमा पाँच हजारको पीसीआर परीक्षण गर्नुपर्छ ।

अब संक्रमितको संख्यापनि वृद्धि हुदै गएको छ । त्यसैले अब १५ हजार किट र पीसीआर मेशिन खरिदको तयारीमा छौं । एकदुईदिन मै बोलपत्र पनि आह्वान गर्ने तयारीमा छौं ।” पीसीआर मेशिनको खरिदका लागि छलफल चलिरहेकोले यसमा चाडै निर्णय हुने पनि उहााले बताउनु भयो ।

उहाँले भन्नु भयो , “म जर्मनीको मेशिनको खोजीमा छु । अहिलेसम्म जर्मनीको मेशिन नै धेरै संचालनमा रहेको र भरपर्दो पनि भएकोले त्यही मेशिन ल्याउने सोचमा छु ।” मेयर सरावगीले महानगरपालिका आफैले पीसीआर मेशिन खरिद गर्ने र सहयोगका लागि सामाजिक सञ्जालमा अनुरोध गरेपछि सहयोग गर्नेहरुपनि अगाडि आउन थालेका छन् ।