बीरगंज १ जेठ । 

बीरगंज महानगरपालिकाले बैशाख ६ गते कोभिड अस्पताल संचालनकालागि गरेको सम्झौता कार्यान्वयन हुन नदिन अनेकौ तिकडमहरु भए ।

यही तिकडमका वीचमा गण्डक अस्पताल कोभिड अस्पतालको रुपमा संचालनमा आउने भयो । बिहिवार गण्डक अस्पतालमा रहेका बिरामीलाई सिफ्ट गरिएको छ ।

अस्पताललाई डिस्इन्फेकटेड गरिदैछ । कोभिड अस्पतालको सेटअप तयार हुदैछ र आवश्यक स्थानमा सिसी क्यामरा जडान हुदैछ । गण्डक अस्पतालमा अहिले ५० शैय्याको अस्पताल संचालन हुने छ । बैशाख ३० मा स्वास्थ्य मंत्रालयले बीरगंजको नारायणी अस्पताललाई कोभिड अस्पताल संचालनकालागि अख्तियारी दिएको थियो । 

बीरगंज महानगरपालिकाको ब्यवस्थापनमा अस्पताल संचालन हुने भएको हो । अस्पताल संचालनकालागि बीरगंज महानगरपालिकालाई संघीय मामिला तथा सामान्य प्रशासन  मंत्रालयले सहयोग गर्ने प्रतिवद्धता आएको नेकपाका नेता तथा सम्बिधान सभाका सदस्य बिचारी यादवले जानकारी दिनु भयो ।

नेता यादवले आजै संघीय मामिला तथा सामान्य प्रशासन मंत्री ह्रदेश त्रिपाठीलाई उहाँकै कार्यकक्षमा गएर भेट गर्नु भएको थियो । भेटमा नेता यादवले बीरगंजमा कोरोना भाइरसको संक्रमणको अवस्था र कोभिड अस्पतालका बिषयमा भएका प्रयासहरुको बारेमा जानकारी गराउनु भएको थियो ।

नेता यादवले नागरिकको जीवन जोगाउन अहिलेको आवश्यकता रहेकोमा केही जनप्रतिनिधिहरु जनताको जीवनसंग खेलवाड गर्दै आफनो स्वार्थी राजनीति जोगाउन उद्धत रहेको प्रष्ट पार्नु भएको थियो ।

कोभिड अस्पताल संचालनकालागि स्रोतको अभाव हुने र अस्पतालको अभावमा नागरिकले सास्ती पाउने अवस्थाबाट बीरगंजलाई मुक्त पार्न नेता यादवले मंत्री त्रिपाठीसंग आग्रह गर्नु भएको थियो ।

नेता यादवले बीरगंज महानगरका प्रमुख बिजय कुमार सरावगीको नागरिक रक्षामा देखिएको अडानलाई असफल पार्ने उनकै पार्टीबाट असयोग भएको बेलामा संघीय सरकारले बीरगंज महानगरलाई सघाउन  पर्ने नेता यादवले सुझाव दिनु भएको थियो ।

जवाफमा मंत्री त्रिपाठीले बीरगंज महानगरका प्रमुख बिजय कुमार सरावगीलाई फोन गरेर आवश्यक स्रोत साधनको चिन्ता नलिइकन जनताको सुरक्षाकोलागि काम गर्न सुझाव दिनु भयो ।

उहाँले महानगर प्रमुख सरावगीले कोरोना भाइरसको संक्रमणको नियन्त्रणमा निर्वाह गरेको भूमिकाको प्रशंसा गर्दै बजेट प्रस्तावना पठाउन समेत र त्यो अनुरुपको बजेट निकासमा आफूले काम गर्ने आश्वासन दिनु भयो । उहाँले महानगरलाई कोभिड अस्पतालको ब्यवस्थापनमा नेतृत्वदायी भूमिका निर्वाह गर्न समेत आग्रह गर्दै मंत्रालय साथमा रहने प्रतिवद्धता जनाउनु भएको थियो । 

बीरगंज महानगरपालिका प्रमुख बिजय कुमार सरावगीको सचिवालयले पनि मंत्री त्रिपाठीसंग भएको सम्वादको बारेमा पुष्टि गरेको छ । मंत्रीले लागत अनुमान गरि बजेट माँग गरेर मंत्रालयमा पत्राचार गर्न भन्नु भएको सचिवालयले जनाएको छ । संघीय मामिला मंत्रालय स्थानीय निकायको तालुकवाला मंत्रालय भएकोले पनि मंत्री त्रिपाठीको सहयोग र सदभाव महत्वपूर्ण रहने छ ।