छिपहरमाईको मतगणना सूचारु गर्न आयोगले दियो निर्देशन, सुरक्षाको ब्यवस्था मिलाउन प्रशासनलाई आदेश

इसीमाना सम्बाददाता २०७९ जेठ २ गते ०९: २२ मा प्रकाशित 588 पटक पढिएको

पर्साको छिपहरमाई गाउँपालिका वडा नम्बर २ मा रोकिएको मतगणना सुचारु गर्न निर्वाचन आयोगले निर्देशन दिएको छ । निर्वाचन आयोग नेपालले जिल्ला निर्वाचन कार्यालय पर्सालाई बोधार्थ बनाई निर्वाचन अधिकृतको कार्यालय छिपहरमाई र जिल्ला प्रशासन कार्यालय पर्सालाई पठाइएको पत्रमा वडा नम्बर २ को मत गणना सुचारु गर्न निर्देशन दिइएको छ ।

आयोगका उपसचिव ऋषिराम भुषालद्वारा जारी पत्रमार्फत कानुनबमोजिम प्रक्रिया पुगी मतगणना प्रतिनिधि अनुपस्थित भए पनि मतगणनालाई निरन्तरता दिन निर्देशन दिएको छ । साथै मतगणना प्रक्रियामा भरपर्दो सुरक्षा व्यवस्था मिलाउन प्रमुख जिल्ला अधिकारीलाई निर्देशनसमेत दिइएको छ ।

पर्साको छिपहरमाई गाउँपालिकामा नेपाली कांग्रेसका अध्यक्षका उम्मेदवार नविन कुमार सिंहले मतगणनामा अनियमितता भएको आरोप लगाए पछि स्थगीत रहेको मतगणना सूचारु गर्न आयोगले निर्देशन दिएको हो ।

गाउँपालिकाको मतगणना गर्दा करारमा नियुक्ती गरिएका कर्मचारीको संलग्नताले अनियमितता भएको नेपाली कांग्रेसबाट गाउँपालिका अध्यक्षका उम्मेदवार सिंहले बताएका थिए ।

नेकपा एमालेबाट अध्यक्षका उम्मेदवार मनोज कुमार गुप्ताले भने हार मानसिकताको उपजस्वरुप विरोध गरेर बिथोल्ने प्रयास भएको प्रतिक्रिया दिएका छन् । निर्वाचन आयोगले नै कर्मचारी नपठाएर यहाँकै कर्मचारीलाई प्रयोग गरेको बताउँदै गुप्ताले मत गणनामा कुनै अनियमितता नभएको दावी गरेका छन् ।

वडा नम्बर २ को ५ वटा बुथमध्ये ३ वटाको गणना हुँदै गर्दा विवाद उत्पन्न भएर मतगणना रोकिएको छ ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।