काठमाडौं २६ चैत  । पैसाकालागि प्रतिष्ठा दाउमा लगाउने कुरा कतिपयलाई सहजै हुन्छ । नेपाल जस्तो भ्रष्टाचार संस्थागत भएको मुलुकमा त अनधिकृत कारोवारका कारण पैसा कमाउनेहरुको सामाजिक प्रतिष्ठा पाउने संस्कृति छ ।

फूर्ती र शक्तिको उपयोग तिनैले गर्ने कुरा आम छ नै  । त्यसको पछिल्लो उदाहरण सुलभ अग्रवालको रुपमा बाहिरिएको छ । सुलभ नाम भएका तर असहज अवस्था सृजना गरेर धन जम्मा गर्ने समाज भित्र अरु पनि धेरै छन । 

जगदम्बा ग्रुपका अध्यक्ष सुलभ अग्रवाललाई पैसाको कमी थियो र ? संकटको घडीमा उनी कालो बजारी गर्दै हिडनु पर्यो ? यस्ता प्रश्न कतिपयको मनमा उठछ तर मुलुकले असहज र संकट परेको बेलामै कमाउन पल्केकाहरुकोलागि त यस्ता महामारी अवसर नै हुने गर्दछ । 

अग्रवाल किन समातिए?

सुलभ अग्रवाललाई प्रहरीले समातेर कालोबजारी नियन्त्रणमा भूमिका खेल्यो भन्ने लाग्ला तर प्रहरीको यो काममा एउटा इमान्दार प्रयत्न बाहेक अरु दक्षता भने देखिदैन । प्रहरीले परिचालन गरेको जनशक्तिले दिएको सूचनाका आधारमा अग्रवाल प्रहरीको हात लागेका होइनन ।

कुटनितिक नियोगको नम्बर प्रयोग गरेर काठमाण्डौ बिनाकुनै रोकटोक गाडी कुदाउदै आएका अग्रवालले कतिपय अवस्थामा प्रहरीको सलाम भेट्थे ।

त्यस्तो भिआइपीलाई प्रहरीले शंकाको आधारमा हेर्ने सम्मको दुष्साहस गर्ने कुरै थिए । कोरोना भाइरसको संक्रमणको फैलावट जुन गतिमा भएको छ त्यसको पहिचान नियन्त्रणकालागि बिभिन्न उपकरणको आवश्यकता त छदैछ । ज्वरो नाप्ने थर्मल गन अहिले देश भरिका स्थानीय तहहरुले किन्न खोजिरहेका छन ।

संसार भरि यसको खपत बढेकोले पर्याप्त पाउन पनि गार्हो छ । तर ठुला घरानकाले बढी लगानी गरेर अभाव सृजना गरेर ५ हजारको बस्तु १५ हजारमा बेच्ने काम हुने नै भयो ।

पश्चिम तिरका एक जना सप्लार्यसलाई थर्मल गन चाहियो  उता सप्लाई गर्न । अग्रवालसंग माल भएको उनले बुझेका थिए। अग्रवालसंग कुरा हुदा १५ हजारबाट एक पैसा नघटेपछि “अप्रेशन”को योजना तयार भयो । त्यसपछि मात्र प्रहरी क्रिेता बन्यो र अग्रवाललाई फन्दा पार्न सक्यो । 

अस्पतालमा बस्ने अग्रवालको जुक्ति 

अग्रवाललाई दरबारमार्गस्थित प्रहरी बृत्तको हिरासतमा राखेको छ । शुरुमा हिरासतभित्र छिर्नै नमानेका सुलभलाई प्रहरीले त्यहाँ छिराउन बल प्रयोग गर्नुपरेको थियो ।

हिरासतमा राखिएलगत्तै शुरु भयो, नाटक । उनको जुत्ता,मोजा र बेल्ट खोल्दै प्रहरीले मोबाइल,पर्स, घडीजस्ता सामान ड्युटी अफिसरको जिम्मा लगायो । अनि, सुलभ छाती समाउँदै कराउन थाले, ‘मरेँ मरेँ‘मलाई बचाउनुस्‘’

अग्रवालले नर्भिकमा लैजान भनेका थिए । तर प्रहरीले सरकारी अस्पताल र चिकित्सककोमा बाहेक निजीमा लान नमिल्ने बताएर उनको वतानुकुलित कक्षमा बस्ने धोको तुहाइदिए ।

यसो त मंत्री ठुला नेता  ब्यपारी र  प्रहरीकै उच्च पदस्थ अधिकारीले उनको सुविधाकालागि सिफारिश गरेका थिए । तर अदालतको आदेश बिना निजीमा लान नमिल्ने भएपछि अग्रवाल बीर अस्पताल पु्र्याइए ।

अग्रवाल सात दिन न्यायीक हिरसातमा 

व्यवसायी सुलभ अग्रवाललाई थप सात दिन हिरासतमा राखेर अनुसन्धान गर्न जिल्ला प्रशासन कार्यालय काठमाडौंले प्रहरीलाई अनुमति दिएको छ ।

थर्मल गनको कालो बजारी गरिरहेको अवस्थामा मंगलबार  प्रहरीले अग्रवाललाई नक्सालबाट समातेको थियो । 

शंकर ग्रुपका सन्चालक  नेपाल उधोग परिसंघका उपाध्यक्ष समेत रहेका अग्रवाललाई ज्वरो नाप्ने थर्मल गनलगायतका स्वास्थ्य सामग्री चीनबाट ल्याएर महँगोमा बेचेको आरोप लागेको छ । यद्यपि उनले प्रहरीलाई प्रारम्भिक वयान दिँदा सो आरोप अस्वीकार गर्दै आएका छन् ।

उनले आफ्ना कर्मचारीहरुका लागि आवश्यक स्वास्थ्य सामग्री लकडाउन अघि नै काठमाडौंको न्यूरोडबाट किनेको बताएका छन् ।

उनी कूटनीतिक नियोगको गाडी चढेर स्वास्थ्य सामग्री बिक्रीका लागि नक्साल पुगेको अवस्थामा पक्राउ गरेको महानगरीय प्रहरी अपराध महाशाखाको टोलीको दाबी छ ।

उनीमाथि लागेको आरोप पुष्टि भएमा उनलाई विगो जफत र विगो बराबरको जरिवाना वा पाँच वर्ष कैद वा दुवै सजायँ हुने सुरक्षा स्रोतले बतायो ।