बीरगंज १७ चैत ।
जिल्ला बिपद ब्यवस्थापन समितिको सोमवार बीरगंजमा बसेको बैठकले लकडाउनलाई अझ प्रभावकारी बनाउने निर्णय गरेको छ ।

त्यसकोलागि कम भन्दा कम आवत जावत गर्ने र त्यस सम्बन्धमा नेपाल सरकारले गरेको सबै आदेशरुको पूर्ण कार्यान्वयन गर्ने निर्णय भएको समितिका सदस्य सचिव ललितकुमार बस्नेतले जानकारी दिनु भयो । नेपाल प्रहरी ,सशस्त्र प्रहरी र नेपाली सेना समेतको संयुक्त टोलीले लकडाउनको प्रभावकारिताकालागि जनचेतना जगाउने छ ।

पर्साका प्रमुख जिल्ला अधिकारी बिष्णु कुमार कार्कीको अध्यक्षता भएको बैठकमा  नेपाली सेनाका सहायक रथी अनुपजंग थापाले कोरोना संक्रमणको सन्दर्भमा बिशेष प्रकाश पार्नु भएको थियो ।

स्थानीय सरकारका प्रमुखहरु सामाजिक संघ संस्था र राजनीतिक दलका प्रमुखहरुको सहभागिता रहेको सो बैठकमा सहायक रथी थापाले नेपाल कोरोना भाइरस संक्रमणको पहिलो चरणमा रहेको बताउनु भएको थियो ।

संसारमा कोरोना भाइरसको संक्रमण स्पेन र इटालीमा भएको क्षती र भोग्नु परेका सामाजिक पीडाको दुश्य सहितको प्रस्तुतीले सबैलाई सोचमग्न बनाएको थियो ।

नेपाल पहिलो चरणमा रहेको चर्चा गर्दै रथी थापाले यही बेलामा कोरोनाको संक्रमणलाई नियन्त्रण गर्न नेपालीले सक्ने र त्यसको लागि पूर्ण रुपमा लकडाउनको पालना गर्नु पर्ने बताउनु भयो । सामाजिक रुपमा दुरी कायम राख्ने र संक्रमणलाई फैलीन नदिन सावधानी अपनाउदा सम्म कोराना भाइरसको संक्रमण नियन्त्रणमा छ भन्न सकिन्छ उहाँले भन्नुभयो “तर संक्रमीत एक ब्यक्तिबाट अर्कोमा गयो भने त्यसले सामुदायीक सत्रमा संक्रमण फैलीन्छ र नेपाल जस्तो गरिब मुलुकले त्यसलाई कुनै पनि हालतमा नियन्त्रण गर्न सक्ने अवस्था रहदैन” ।

 
तर सामाजिक दुरीलाई कायम राख्न अपनाउनु पर्ने सावधानीका बिषयमा स्थानीय सरकार र स्थानीय प्रशासनकावीचमा एकमत कायम हुन सकेको छैन ।

 त्यसमाथि लकडाउनमा सुविधा सम्मन्न कोठामा बसेर साँसद र नेताहरुले यो नगर त्यो नगर भनेर जारी गर्ने बिज्ञप्तिहरुले पनि नागरिकमा अन्यौलता सृजना गरेको छ । यस्तो परिवेशमा सम्पन्न बैठकले लकडाउनलाई प्रभावकारी बनाउन लिएको निर्णय कसरी परिपालना हुन्छ त्यो भने हेर्न बाकी छ । 

बैठकले  बिदेशबाट आएका नागरिकको पहिचान गरि उनीहरुलाई क्वारेन्टाइनमा राख्न स्थानीय निकायहरुले जिम्मेवारी लिने गरि निर्णय गरेको छ ।

बैठकले कोरोना भाइरसको संक्रमणको परिक्षण बीरगंजमा गर्नु पर्ने ठहर गर्दै त्यसकोलागि केन्द्र सरकारसंग पहल गर्ने  निर्णय गरेको छ । बीरगंजमा नेपाल आर्युवेद मेडिकल कलेज र सिद्धार्थ माध्यामिक बिद्यालयमा गरि १ सय बेडको क्वारेन्टाइन तयारी अवस्था रहेको र त्यसलाई सुविधा सम्पन्न बनाउने निर्णय गरेको छ ।

आजको बैठकमा  आइसोलेशन वार्डलाई पिपीई सहितको सुविधा सम्पन्न बनाउने निर्णय त भएको छ । तर बिरामीको उपचार नगरि फर्काउने घटना बाहिर आएपछि नेशनल मेडिकल कलेजको आइसोलेशन वार्ड के हुन्छ भन्ने बिषयमा अन्यैेलता बढेको छ ।  

प्रदेश सरकारको आन्तरिक मामिला मंत्रालयबाट आएको ५० लाख रुपैयाको बारेमा बैठकमा जानकारी गराउनकासाथै त्यसको खर्च कोरोना भाइरस नियन्त्रणकालागि आवश्यक समाग्री र उपकरण खरिदमा खर्च गर्ने निर्णय भएको छ ।

राहत बितरणलाई ब्यवस्थित र बैज्ञानिक बनाउन एकद्वार प्रणालीमा ल्याउने निर्णय भएको समितिका सदश्स्य सचिव बस्नेतले जानकारी दिनु भयो ।