वीरगन्ज, ९ चैत । विश्वभर महामारीको रुपमा फैलिएको कोरोना भाईरस (कोभिड–१९) को संक्रमणको सीमावर्ती सहरमा त्रास फैलिएको छ । नेपालसँग सीमा जोडिएको भारतीय राज्य विहारमा पनि कोरोनाको संक्रमित व्यक्तिको मृत्युपछि नेपालको सीमाक्षेत्रका जनता पनि त्रसित भएका हुन् । भारततर्फ पनि २२ मार्च अर्थात चैत ९ गते नै एकदिन ‘जनता कफर््यु’ घोषणापछि सीमावर्ती सहर रक्सोल पनि सुनसान भएको छ ।

दैनिक लाखौं संख्यामा रेल मार्फत यात्रा गर्ने यात्रुहरु आईतबार रेलवे स्टेशनमा एकजना पनि देखिनन् । सधैं भीड हुने गरेको रेल स्टेशन आईबार भने सुनसान देखिन्थ्यो । यहीबीचमा भारतको बिहार प्रान्तमा कोरोना भाइरसको संक्रमणका कारण एकजनाको ज्यान गएको छ । दुबै मिर्गौला काम नलाग्ने भएर बिहारको राजधानी सहर पटानाको एक्स अस्पतालमा उपचार गराईरहेको ३८ वर्षीय सैफ अली नाम गरेका पुरुषको ज्यान गएको हो ।

कतारबाट फर्किएका उनको दुबै मिर्गौला काम नलाग्ने भएर अस्पतालमा उपचारका लागि भर्ना भएका थिए । उनको शनिबार विहान मृत्यु भएको थियो । उनमा कोरोना भाइरसको संक्रमण रहेको पुष्टि भएको थियो । विहारमा पनि कोरोनाको काराणले मृत्यु भएको खबरपछि विहारसँग सीमा जोडिएका प्रदेश नम्बर २ कोरोनाको उच्च जोखिममा रहेको छ ।

कोरोना संक्रमण फैलिन नदिन प्रदेश २ का सीमानाकाहरु बन्द गरिएको छ । केहीलाई मात्र खुल्ला राख्दै अधिकांश सीमा नाकाहरु आइतबार बिहानैदेखि बन्द गरिएको हो । सप्तरीका कुल आठमध्ये ७ वटा सीमानाका बन्द गरिएको छ । सिरहामा दुईबाहेक सबै सीमा नाका बन्द गरिएको छ । माडर र ठाडीबाहेक सबै सीमानाका बन्द गरिएको छ ।

धनुषामा ३७ बाहेक ३५ वटा सीमा नाका बन्द गरिएको छ । महोत्तरीमा एकनाका बाहेक सबै सीमानाका बन्द गरिएको छ । जिल्लाको भिठामोड बाहेकका नाका बन्द गरिएको प्रदेश नम्बर २ को आन्तरिक मामिला तथा कानून मन्त्रालयका सचिव कृष्णहरि पुष्करले जानकारी दिए । उनका अनुसार सर्लाहीमा पनि दुई वटा सीमानाका मात्रै खोलिएको छ । रौतहटमा एक वटा नाका मात्रै खोलिएको छ । बाराका ५ वटा सीमा र पर्सामा एक बाहेक सबै सीमा बन्द गरिएको छ ।

रक्सौलबाहेकका सबै सीमानाका बन्द गरिएको हो । कोरोना भाइरस छिमेकी देश भारतमा समेत आइसकेका कारण उच्च सतर्कता अपनाउन सबै जिल्लाका सुरक्षा अधिकारीहरुको बैठकले यस्तो निर्णय गरिएको हो । नाका बन्द गरिएपनि सीमावर्ती सहरका स्थानीय र अस्पतालहरुमा भने कोरोनाको त्रास झन बढेको छ । सीमानाकामा स्वास्थ्य परिक्षण गराएर भित्रिएकाहरुलाई पनि केही दिनपछि बिरामी हुने र उपचारका लागि अस्पतालमा जाँदा अस्पतालका स्वास्थ्यकर्मीहरु तथा चिकित्सकहरु नै कोरोनाको त्रासले उपचार गर्न डराउने गर्दा झन त्रास बढेको हो ।