वीरगन्ज, २७ पुस । गृहमन्त्री रामबहादुर थापा बादलले देशको समृद्धिको बाधकका रुपमा रहेका पुराना कानूनहरु हटाउने काममा सरकार लागेको बताएका छन ।

 वीरगन्ज उद्योग वाणिज्य संघको ४३ औं साधारणसभाको उदघाटन गर्दै गृहमन्त्री बादलले जनताको संघर्षबाट पूरानो र केन्द्रीकृत राज्य व्यवस्थालाई भत्काइएको बताए ।

उनले  संघीय लोकतन्त्रिक शासन व्यवस्थाको स्थापना भएकोले अब हिजोका सबै समृद्धिको बाधकका  रुपमा रहेका कानुनहरु विस्थापित हुने बताए  ।

स्वधिनता, संस्कृति र पहिचानको रक्षा गर्ने नीति बनाउनु आवश्यक भएको बताउदै गृहमन्त्री बादलले जनतालाई आफ्नो ठाउँमा आफ्नो अधिकार प्रयोग गर्ने कानुन र नीति निर्माणको लागि नै देश संघीयतामा रुपान्तारण भएको बताए । वीरगन्जको योगदान र भूमिकालाई उचित मूल्यांकन र कदर नगर्नुको पछाडि राजनीतिक अवस्था र व्यवस्था जिम्मेवार रहेको उनको भनाई थियो । उनले भने, “हामीले आफैले कानुन बनाउने राजनीतिक प्रणालीको विकास गरेका छौं ”।

वीरगन्जलाई केन्द्रले हेरेन विकासको निम्ति उचित मूल्यांकन नगरेको भन्ने गुनासो र पश्ताचाप गर्नुको अव कुनै अर्थ नरहेको उनले बताए । अव आफनो समस्याको हल आफैले गर्ने ब्यवस्था आएको छ कसैलाई सरापेर आफनो बिकास नहुने कुरा अव बुझ्दा हुन्छ उनले भने  ।

त्यो हिजोको विषय भएकोले त्यसलाई समाधान गर्न हिजोका एकात्मक प्रणालीको अन्त्य गरेका छौं ।” अब वीरगन्जको निर्माण वीरगन्जवासीले गर्नुपर्छ, प्रदेशका प्रतिनिधिहरुले गर्ने हो अव  यसरी बिकासको अभियान अगाडि बढाउनु पर्छ । अरु कसैले गरिदेला र कसैले गर्ला भन्ने सोच बदल्नुपर्छ, उनले भने ।

वीरगन्ज बिकास र, मधेसकोसमग्र देशको विकास जनप्रतिनिधिको काँधमा आएको उनको भनाई थियो । मन्त्री बादले भने, “हामीले कस्तो विकास गर्ने ? कस्तो नियम कानुन बनाउने ? त्यो सबै अब जनप्रतिनिधिहरुले गर्ने हो । हामीले संविधान बनाईसकेका छौं । त्यसको अधिकार प्रयोगका लागि कानुन बनाउने प्रकृयामा छौं ।

हिउँदे अधिवेशनले विगतमा हाम्रो समृद्धिमा बाधक भएका कानुनहरुलाई खारेज गर्ने र नयाँ कानुन निर्माण गर्नेछ ।” हिजोका सांस्कृतिक पहिचान, अधिकारको बाधक कानुनलाई विस्थापित गर्ने जनप्रतिनिधिहरुको काँधमा जिम्मेवारी आएको उनले बताए । वीरगन्ज उद्योग वाणिज्य संघका अध्यक्ष ओम प्रकाश शर्माको अध्यक्षतामा भएको कार्यक्रममा नेपाल कम्युनिष्ट पार्टीका केन्द्रीय सदस्य नागेन्द्र चौधरी ,संघीय संसद प्रदीप यादव, वीरगन्ज महानगरपालिकाका प्रमुख विजय कुमार सरावगी, नेपाल उद्योग वाणिज्य महासंघका उपाध्यक्ष उमेशलाल श्रेष्ठ लगायतले शुभकामना मन्तव्य राखेका थिए ।

सो अवसरमा वीरगन्ज उद्योग वाणिज्य संघले विभिन्न क्षेत्रमा योगदान पु¥याएका व्यक्तिहरुलाई सम्मान गरेको थियो  । नेपाल पत्रकार महासंघ प्रदेश नम्बरका अध्यक्ष दीपेन्द्र चौहान, ब्रोडकाष्टिङ एशोसिएन प्रदेश नम्बर २ का संयोजक आरसी यादव, प्रेस सेण्टर नेपाल पर्साका अध्यक्ष नीरज पिठाकोटे नेपाल पत्रकार महासंघ पर्साका अध्यक्ष श्याम बन्जारा सामाजिक अभियान्ता प्रकाश थारु र प्रेस युनियन पर्साका अध्यक्ष रामनारायण कुर्मी लगायतका व्यक्तिहरुलाई गृहमन्त्री रामबहादुर थापा बादलले प्रशंसा पत्र सहित सम्मान गरे ।