असोज २४ । जेन–जी आन्दोलनको दोस्रो दिन नख्खु कारागारबाट फरार भएका कैदी आकाश मगरले आफ्नै साथीको हत्या गरेको तथ्य बाहिर आएको छ।
प्रहरीका अनुसार, आकाशले मकवानपुर घर भई हाल बालाजु मनमैजु बस्ने २५ वर्षीय सुरज तामाङको हत्या गरेका हुन्। गत असोज १३ गते साँझ ठमेलस्थित बुद्धबार गल्लीमा रहेको ह्याप्पी होटेल अगाडि खुकुरी प्रहारबाट सुरज गम्भीर घाइते भएका थिए।
उनी उपचारका लागि वीर अस्पतालमा भर्ना गरिएका थिए तर असोज १४ गते निधन भयो। अनुसन्धानपछि प्रहरीले हत्यामा सुरजकै पुरानो साथी आकाश मगरको संलग्नता देखिएको बताएको छ।
प्रहरीका एक अधिकारीका अनुसार, आकाश र सुरजबीच पुरानो चिनजान थियो। नख्खु कारागारबाट भागेपछि व्यक्तिगत विवादका कारण आकाशले सुरजमाथि खुकुरी प्रहार गरेको देखिन्छ।
आकाश मगर लागुऔषध मुद्दामा दोषी ठहर भई २०८० असोज २७ गतेदेखि नख्खु कारागारमा थुनामा रहेका थिए।
तर, जेन–जी आन्दोलनको दोस्रो दिन, राष्ट्रिय स्वतन्त्र पार्टीका सभापति रवि लामिछाने कारागारबाट बाहिर निस्किएसँगै कैदी–बन्दीहरूको समूहले पनि नख्खु कारागारको ढोका तोड्दै भागेका थिए।
त्यही भिडमा आकाश समेत बाहिर निस्किएको पुष्टि भएको छ।
हालसम्म ५ हजारभन्दा बढी कैदी र बन्दीहरू कारागार फर्किएका छैनन्। केही भागेका कैदीहरू भारतमा पक्राउ परेका छन् भने कतिपय अझै फरार छन्।
तपाईको प्रतिक्रिया