काठमाडौँ । काठमाडौँको टोखा नगरपालिका–२ चण्डेश्वरीमा पाँचथर घर भएका ४० वर्षीय राम लिम्बूको हत्या अभियोगमा प्रहरीले दुई जनालाई पक्राउ गरेको छ।
पक्राउ पर्नेमा सोही ठाउँ बस्ने उदयपुर घर भएका २७ वर्षीय गणेश लामा र सिन्धुली घर भएका ४० वर्षीय खुपबहादुर तामाङ रहेका छन।
जिल्ला प्रहरी परिसर काठमाडौँका प्रवक्ता प्रहरी उपरीक्षक पवनकुमार भट्टराईका अनुसार वादविवादको क्रममा फलामको रड प्रहार गर्दा लिम्बू गम्भीर घाइते भएका थिए।
उनीलाई उपचारका लागि ट्रमा सेन्टर पुर्याइएको थियो, तर उपचारको क्रममा उनको मृत्यु भएको प्रहरीले जनाएको छ।
घटनामा संलग्न दुवै जनालाई प्रहरी प्रभाग बुढानिलकण्ठबाट खटिएको टोलीले गए राति पक्राउ गरी आवश्यक अनुसन्धान अघि बढाएको प्रवक्ता भट्टराईले जानकारी दिए ।
तपाईको प्रतिक्रिया