बीरगंजमा उद्धारकालागि संयुक्त अभ्यास

इसीमाना सम्बाददाता २०८१ भदौ १३ गते १५: २५ मा प्रकाशित 203 पटक पढिएको

वीरगञ्ज । बीरगंजमा वर्षाको कारण हुन सक्ने प्रकोपबाट मानवीय क्षतीलाई जोगाउनकालागि संयुक्त उद्धार अभ्यास गरिएको छ ।

सशस्त्र प्रहरी बल नेपाल नम्बर १३ गण हेडक्वाटर पर्साको संयोजकत्वमा नेपाल प्रहरी, नेपाली सेना, नेपाल रेडक्रस सोसाइटीको सहभागितामा वीरगञ्ज महानगरपालिका–१० मा रहेको घडीअर्वा पोखरीमा संयुक्त उद्धार अभ्यास गरिएको हो ।

पर्सा जिल्ला विशेषगरी बाढी, डुबान, नदीकटान र आगलागीको उच्च जोखिममा रहेको छ । जल उत्पन्न प्रकोपको न्यूनीकरणकालागि संयुक्त अभ्यास गरिएको पर्साका प्रमुख जिल्ला अधिकारी दिनेश सागर भूसालले बताए ।

बिपतको बेलामा गरिने उद्धारको कामलाई प्रभावकारी बनाउन पूर्वअभ्यासले धेरै महत्व राख्ने भूसालले बताए ।

संयुक्त उद्धार अभ्यासमा क्रममा नदीमा फसिरहेका सर्वसाधारणलाई उद्धार कसरी गर्ने , नदीमा बीच भागमा रहेका पीडितलाई सुरक्षित स्थानतर्फ लैजान सुरक्षा फौजले कसरी काम गर्ने , पानीको बहाव धेरै भएको बेला कसरी पीडितलाई उद्धार गर्ने भन्ने कुरा देखाइएको थियो ।

बीरगंज समुद्री सतहबाट पाँच सय २३ मिटरको औसत उचाइमा रहेको छ ।

पर्सामा चुरे क्षेत्र हुँदै बग्ने ओरिया, सिर्सिया, गङ्गोल, नौरङ्गिया, तिलावे, सिक्टा नदीका साथै ठुटेखोला, ओडारखोला सिकारीबास खोला रहेका छन् । मौसमजन्य विपद्अन्तर्गत नेपाल विश्वमा ११औँ स्थानमा पर्छ ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।