अध्यागमनका हाकिम गोद्ने प्रहरी पुरस्कृत, डिआइजी चन्दको भयो सरुवा

इसीमाना सम्वाददाता २०८० माघ २६ गते ०५: १७ मा प्रकाशित 263 पटक पढिएको

काठमाडौं । त्रिभुवन अन्तर्राष्ट्रिय विमानस्थलमा चेकिङ गर्ने क्रममा अध्यागमन अधिकृतलाई गोद्ने गर्ने तीनजना प्रहरी नगदसहित पुरस्कृत भएका छन् ।

विमानस्थल प्रहरी कार्यालयका प्रमुख डीआईजी अर्जुन चन्दले उनीहरुलाई नगदले पुरस्कृत गरेका हुन । प्रहरी नायब निरीक्षक प्रकाश चौधरी १२ सय, प्रहरी सहायक निरीक्षक सन्जय तामाङ ११ सय र प्रहरी जवान रविजंग गुप्ता ८ सय नगदसहित पुरस्कृत भएका हुन।

उनीहरुलाई पुरस्कृत गरिएको अभिलेख राष्ट्रिय प्रहरी किताब खानामा हुने गरी पत्र पठाइएको स्रोतले बतायो ।

विमानस्थल अध्यागमन कार्यालयमा कार्यरत शाखा अधिकृत छायालाल मोक्तानलाई सुरक्षा जाँच गर्ने क्रममा विवाद भएको थियो । शुक्रबार ड्युटी सकेर निस्किने क्रममा प्रहरीले खानतलासी गर्न खोज्दा विवादित छविका छायालालले प्रहरी जवानलाई असहयोग गरी गाली गरेपछि विवाद भएको थियो ।

उक्त विवाद हुँदा उनले सुरुमा लात्तीले प्रहरीलाई हानेको सिसिटिभी फुटेजमा देखिएको छ । यसैवीच त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख प्रहरी नायव महानिरीक्षक (डीआईजी) अर्जुन चन्द ठकुरीको सरुवा भएको छ ।

गृह मन्त्रालयले चन्दलाई विमानस्थलबाट प्रहरी प्रधान कार्यालयको प्रदेश समन्वय विभागमा काज सरुवा गरेको हो । प्रदेश समन्वय विभागको प्रमुखमा हाल एआईजी सुदिप गिरी छन् ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।