मधेशी समुदायको सूचीबाट थारु र मुस्लिम हटाउने आयोगको निर्णय

इसीमाना सम्वाददाता २०७९ मंसिर २७ गते ०६: ५३ मा प्रकाशित 531 पटक पढिएको

थारु र मुस्लिमलाई मधेशीमा सूचीकृत गर्न सिफारिश गरेको मधेशी आयोगले अन्तत थारु र मुस्लिमलाई मधेशी समुदायको सूचीबाट हटाउने निर्णय गरेको छ ।

नेपालमा मधेशी समुदायको थर सूचीकरण अध्ययन प्रतिवेदन २०७८ मा उपसमूह १ मा रहेको थारु र २ मा रहेको मुस्लिमलाई हटाउने निर्णय गरेको आयोगका अध्यक्ष डा. विजयकुमार दत्तले बताए । ०७९ मंसीर २० बसेको बैठकले यस्तो निर्णय गरेको डा. दत्तले बताए ।

मधेशी आयोगले गरेको निर्णय कार्यान्वयनको लागि आयोगकी उपसचिव सबिता डङ्गोलले प्रधानमन्त्री तथा मन्त्रिपरिषद्को कार्यालयलाई पत्र पनि पठाएकी छन् ।

थारु र मुस्लिम समुदायका विभिन्न संघ(संगठनहरुले थारु र मुस्लिम समुदायको छुटै पहिचान र सभ्यता रहेको र मधेशी समुदायसँग नमिल्ने भएकोले मधेशी क्लस्टरमा आफूहरूलाई नराख्न मधेशी आयोगमा उजुरी दिएका थिए ।

आयोगका अध्यक्ष डा.दत्तका अनुसार उक्त उजुरीमाथि आयोगले निर्णय लिँदै थारु र मुस्लिमलाई मधेशीबाट हटाउने निर्णय गरेको हो ।

मधेशी आयोगले २०७८ ७९ को वार्षिक प्रतिवेदन मार्फत राष्ट्रपति विद्यादेवी भण्डारी समक्ष थारु र मुस्लिम सहित १४९ जातलाई मधेशीको रूपमा सिफारिस गरेको थियो ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।