पर्सा क्षेत्र नम्बर १ का प्रतिनिधिसभा सदस्य प्रदीप यादवले पत्रकार स्वर्गीय नरेश सर्राफ स्मृतिमा स्थापना हुने अक्षयकोषमा एक लाख रुपैयाँ सहयो गर्ने बताएका छन ।

स्व. सर्राफको १३ औँ दिनको पूण्यतिथिका अवसरमा नेपाल पत्रकार महासंघले आयोजना गरेको श्रद्धाञ्जली सभालाई सम्बोधन गर्दै सांसद् यादवले १ लाख आर्थिक सहयोग उपलब्ध गराउने बताएका हुन ।  नेपाल पत्रकार महासंघ पर्सा शाखाले पत्रकार नरेश सर्राफको स्मृतिमा युवा क्रियाशील पत्रकारिता पुरस्कारको घोषणा गरेको छ । दिवंगत पत्रकार सर्राफको १३ औं दिनको पुण्यतिथिमा बुधबार महासंघको सभाहलमा आयोजना गरिएको श्रद्धाञ्जली सभामा महासंघले पुरस्कारको घोषणा गर्नुको साथै अध्यक्षकोष स्थापना गर्ने समेत निर्णय गरेको छ ।

सांसद् यादवले प्रधानमन्त्रीलाई भनेर भएपनि अर्थ मन्त्रालयबाट सर्राफका परिवारको लागि विशेष राहतको व्यवस्था गर्ने आश्वासन पनि दिएका छन् । पर्साको पत्रकारिता क्षेत्रमा सर्राफको निधनले क्षति भएको बताउँदै पूर्वमन्त्रीसमेत रहेका यादवले स्व.सर्राफले अंगालेको मार्गमा निर्देशित भई निष्पक्ष र निडर पत्रकारिता गर्नुपर्नेमा जोड दिएका छन् ।

सर्राफ स्वच्छ छविका र ईमान्दार पत्रकार भएको बताउँदै यादवले उनको जस्तो स्वभाव भएको पत्रकार पर्साले पाउन मुस्किल पर्ने बताए । विशेष गरी भूइँतहका र सर्वसाधारण नागरिकका समस्या एवम् पिडाहरुलाई खोजी खोजी पत्रकारिता गरेमा उनीप्रति सच्चा श्रद्धाञ्जली हुने विश्वास पनि यादवले व्यक्त गरेका छन् ।

पत्रकारको हकहित र पेशागत सुरक्षा एवम् मर्यादाका लागि सदैव एकरुप भएर लाग्न आग्रह गर्दै पर्साको पत्रकारिताको उचाईलाई अँझै बढाउन पनि उनले सुझाव दिएका छन् ।

सर्राफ पत्रकार मात्रै नभएर सामाजिक अभियानताको रुपमा विभिन्नि किसिमका सामजिक क्रियाकलापहरुमा पनि सक्रिय रहेको स्मरण गर्दै यादवले उनको छोटो समयको योगदान पनि अविस्मरणीय रहेको बताए ।

कार्यक्रममा नेपाल पत्रकार महासंघका केन्द्रीय सचिव दीपेन्द्र चौहानले पत्रकार सर्राफमा पत्रकारिताको मर्म अनुसारको पत्रकारिता गर्ने गुण रहेको बताए । उनले हिजो मिशन पत्रकारिता भयो बिचार पक्षीय पनि भयो तर त्यो ब्यवसायीक हुनु पर्नेमा दलीय , गुटगत हुदै अहिले ब्यक्तिको पुजा गर्ने तहमा पुगेको चर्चा गर्दै यस्तो पत्रकारिताको बिपक्षमा स्व. पत्रकार सर्राफको अडान महत्वपूर्ण रहेको बताए ।

नेपाल पत्रकार महासंघका केन्द्रीय सदस्य के.सी.लामिछानेले पत्रकारिताको मूल्य मान्यता र सिद्धान्त प्रति प्रतिवद्ध स्व. सर्राफमा जिम्मेवार पत्रकारिता गर्ने हुटहुटी पाएको बताए । सर्राफमा जिज्ञासु बानी थियो र पत्रकारिताको मर्म आलोचनात्मक चेत थियो उनी सत्ताको तावेदारी र ब्यक्ति पूजाको बिरुद्ध थियो उनको अवसान हामी सबैकालागि क्षती हो लामिछानेले भने ।

कार्यक्रममा नेपाल पत्रकार महासंघका मधेश प्रदेशका महासचिव श्याम बन्जारा, वीरगंज उधोग वाणिज्य संघका उपाध्यक्ष हरि गौतम, नेपाल पत्रकार महासंघका पूर्व केन्द्रीय सदस्य महेश दास, नेपाल प्रेस युनियनका केन्द्रीय सचिव अशोक तिवारी , प्रेस सेन्टर नेपालका केन्द्रीय सदस्य निरज पिठाकोटे मगर, समाजवादी प्रेस संगठनका केन्द्रीय सदस्य राघव साहले स्व. पत्रकारको बारेमा प्रकाश पारेका थिए । नेपाल पत्रकार महासंघ पर्साका अध्यक्ष अनुप तिवारीको अध्यक्षतामा भएको कार्यक्रमको संचालन शाखा सचिव भूषण यादवले गरेका थिए ।