बिदेशमा समाजको एकता, सदभाव र सहयोगको परम्परा बिकासकालागि गजुरेलको उम्मेदवारी मतदानकालागि सबैमा अपिल

मनिषा लामिछाने, स्पेन २०७८ सावन १ गते ०९: १३ मा प्रकाशित 391 पटक पढिएको

गैरआवासीय नेपाली संघ, स्पेनको यहि जुलाई २६ तारिकमा आगामी कार्यकालको लागि हुने निर्वाचनमा युरोपका चर्चित पत्रकार दिपेन्द्र गजुरेलले युवा संयोजकमा आफ्नो उम्मेदवारी दिनु भएको छ ।

उहाँ हाल पत्रकार महासंघ यूरोपको उपाध्यक्ष समेत रहनु भएको छ । गजुरेलको पुर्खौली थलो नुवाकोट हो भने काठमाडौं गोठाटारमा स्थायी बसोबास रहेको छ ।

विगत ६वर्ष देखि स्पेनमा बसोबास गर्दै आउनु भएका गजुरेलले नेपालमा हुँदा एभिन्युज टिभी, हिमालय टिभी, न्युज २४ टिभी, माउण्टेन टिभी, आर्थिक अभियान राष्ट्रिय दैनिक, नेपाल समाचारपत्र दैनिक लगायत विभिन्न एफएम रेडियो तथा स्थानीय पत्रिकाहरु संलग्न रहेर संचारकर्ममा क्रियाशिल रहनु भएको थियो ।

स्पेनमा रहेका नेपालीहरुको समस्या र अधिकारका लागि खबरदारी गर्दै निरन्तर कलम चलाईरहनु भएको छ । विदेशी भूमीमा पनि उहाँले नेपाली बीचको एकता र अधिकारका लागि सक्रिय रुपमा काम गरिरहनु भएको छ ।

एनआरएनए स्पेनलाई राजनीतिक दुष्चक्रको प्रभावबाट मुक्त पार्ने उद्धेश्य सहित गजुरेलले समाजको एकता सदभाव र सहयोगको परम्परा बिकासकालागि उम्मेदवारी दिएको बताउनु भएको छ ।

उहाँले नेपालमा रहँदा पनि विभिन्न समाजिक संघ संस्थामा रहि निस्वार्थ भावनाले सहयोग गर्दै सामाजिक उत्तरदायित्व निर्वाह गर्नु भएको थियो । पत्रकारिता पेशामा कलम चलाउँदैै आउनु भएका गजुरेलले स्पेनका विभिन्न सामाजिक संघसंस्थामा रहेर पनि सामाजिक काममा अग्रणी भुमिका निर्वाह गरिरहनु भएको छ ।

उहाँले एनआरएनएलाई आर्थिक रुपमा बलियो, दिगो र पारदर्शी बनाउन आफुले महत्वपूर्ण भुमिका खेल्ने बताउनु भयो । एनआरएन समुदाय केन्द्रित कार्यक्रम नभएकोले यसले युवा पुस्ता तथा बालबालिकालाई आकर्षित गर्न नसकेको भन्दै उहाँले आफूले सिङ्गो टिमसँग मिलेर स्पेनमा बसोबास गर्दै आइरहेका नयाँ नेपाली पुस्ताका लागि काम गर्ने प्रतिवद्धता ब्यक्त गर्नु भयो ।

गजुरेलले आगामी जुलाई २६ तारिकमा अनलाइन माध्यमबाट हुने एनआरएनए स्पेनको निर्वाचनमा युवा संयोजक खुल्ला पदमा आफूलाई मतदान गरी आफूले अघि सारेका योजनाहरु पुरा गर्ने बाटो खोलिदिन पनि आग्रह गर्नु भएको छ ।