बडादशैं २०७८ को अवसरमा ठोरी गाउँपालिका ४ बिजयबस्तीमा समाजसेवी स्वर्गीय राम बहादुर श्रेष्ठ गोल्डकप फुटबल प्रतियोगिता संचालन हुने भएको छ ।
बिजयबस्ती फुटबल आयोजक समितिको आयोजनामा असोज ९ देखि असोज २६ सम्म संचालन हुने खेलमा राष्ट्रिय तथा अन्तराष्ट्रिय खेलाडीहरुको सहभागीता रहने आयोजकले जनाएको छ ।
पर्साको ग्रामीण क्षेत्रमै ठूलो पुरस्कार राशिको उक्त खेलमा प्रथम स्थान प्राप्त गर्ने टीमले २ लाख नगद सहित शील्ड र प्रमाणपत्र, द्वितीय हुने टीमले १ लाख नगद सहित शील्ड र प्रमाणपत्र, खेलभरकै उत्कृष्ट खेलाडीले २० हजार, सर्वाधिक गोलकर्ताले चांदीको जुत्ता र उत्कृष्ट गोल किपरले १० हजार प्राप्त गर्ने आयोजकले जनाएको छ ।
बिजयबस्तीको खेल मैदानमा संचालन हुने खेलका लागि फिल्ड मर्मत तथा सहयोग संकलनको कार्य तिब्र रुपमा भइरहेको आयोजक समितिका अध्यक्ष झलक श्रेष्ठले जानकारी दिए । ठोरी गाउँपालिकाको कार्यालय तथा केही संघसंस्थाहरुले अहिले तयारीका लागि बिशेष सहयोग गरिरहेको आयोजक समितिका मिलन श्रेष्ठले बताएका छ्न ।
साबिक निर्मलबस्तीका पुर्व प्रधानपञ्च स्व. राम बहादुर श्रेष्ठले तत्कालीन कठिन अवस्थामा पनि शिक्षा, स्वास्थ्य, खानेपानी र सुरक्षामा विशेष पहल गरि गाउँवस्तीको पूर्वाधार बिकास तथा गाउँवस्तीलाई स्थायीत्व दिने कार्यमा उल्लेखनीय कार्य गरेको हुदा वहॉको योगदानलाई बिजयवस्तीका युवाहरुले उच्च मुल्याङ्कन गर्दै वहॉकै स्मृतिमा “समाजसेवी स्व.राम बहादुर श्रेष्ठ गोल्डकप” खेलको आयोजना गर्न लागिएको सन्तोष श्रेष्ठले बताए । गत वर्ष देखी यो प्रतियोगिता प्रारम्भ भएको हो ।
तपाईको प्रतिक्रिया