सामाजिक सद्भाव र शान्तिका लागि सबै पक्षसँग राजनीतिक दलको अपिल

इसीमाना सम्वाददाता २०८२ बैशाख ३ गते ०८: ५४ मा प्रकाशित 284 पटक पढिएको

वीरगन्ज । धार्मिक एवम् सामुदायिक सद्भाव कायम गर्न पर्साका राजनीतिक दलहरुले अपिल गरेका छन् ।

बुधबार नेपाली कांग्रेस पर्साको कार्यालयमा बसेको सर्वदलिय बैठकले वीरगन्जमा सामाजिक सद्भाव र शान्तिका लागि सबै पक्षसँग अपिल गरेका हुन् ।

हनुमान जयन्तीको शोभा यात्रामा भएको घटनाबाट विगत केही दिनदेखि वीरगन्ज महानगरपालिका आसपासका क्षेत्रमा भईरहेको सामुदायिक विवाद, आपसी द्धन्द्ध र मनमुटाव प्रति सर्वदलिय बैठकको गम्भिर ध्यानाकर्षण भएको विज्ञप्तीमार्फत जनाइएको छ । वीरगन्जमा देखिएका विवादलाई वार्ता र सम्वादको माध्यमबाट सामाधान गर्न दलहरुले जोड दिएका छन् ।

‘सुरुकै दिनदेखि विभिन्न चरणमा विभिन्न समुदाय र स्थानीय प्रशासनसँग निरन्तर राजनैतिक दल परस्पर सबै पक्षसँग सम्वादमा रहेको कुरा’ विज्ञप्तीमार्फत जनाइएको छ ।

अब उपरान्त समुदायमा सदियौदेखि आपसी भाईचारा, सामाजिक र धार्मिक सद्भावसँग मिलेर बसेको हिसावले यसलाई खण्डित गर्ने अभिव्यक्ति वा टिप्पणी कुनै पक्षबाट गर्न नहुन अपिल गरिएको छ ।

पर्साका राजनीतिक दलहरुको सर्वदलिय बैठकमा नेपाली कांग्रेसका कार्यवाहक सभापति रामनारायण प्रसाद कुर्मी, नेकपा एमालेका अध्यक्ष विश्वम्भर शर्मा, रास्वपाका सभापति हरि पन्त, जसपा नेपालका अध्यक्ष रामनदेश प्रसाद यादव, नेकपा एकीकृत समाजवादीका अध्यक्ष बालगोपाल थापा, जनमत पार्टीका संयोजक ओम प्रकाश शरार्फ, राप्रपाका पन्नालाल प्रसाद पटेल र जसपाका तबरेज अहमदलगायतको सहभागिता रहेको थियो ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।