बीरगंज १ पौष ।  पकहामैनपुर गाउपालिका वडा नंं.३ मा रहेको श्री राम चरित्र भगत माध्यमिक विद्यालयमा दुई जना शिक्षक निमित्त प्रधानाध्यापक नियुक्त भएपछि बिद्यालयको शैक्षीक तथा प्रशासनीक गतिविधि अन्यौलमा परेको छ । 

विद्यालयका निवर्तमान प्रधानाध्यापक धुपनाथ साहले गत कार्तिक ९ गतेबाट अनिवार्य अवकाश पाएपछि विद्यालयका शिक्षक रामादेश चौहानलाई निमित्त प्राधानाध्यापकको जिम्मेवारी दिनु भयो ।  तर बरिष्ठताका हिसावले आफूले निमित्त प्राधानाध्यापकको जिम्मेवारी पाउनु पर्ने भन्दै अर्का शिक्षक नन्द किशोर रामले गाउँ पालिकाको कार्यालयमा उजुरी दिनु भयो । 

गाउपालिका अध्यक्ष विजय चौरसियाले बरिष्ठताको  हिसाबले नन्दकिशोर रामलाई निमित प्रधानाध्यापकको जिम्मेवारी तोकेपछि विद्यालयमा विवाद शुरु भएको हो  ।

विद्यालयका शिक्षक रामादेश चौहानले कुनैपनि प्रधानाध्यापकले अनिवार्य अवकाश भएपछि जुनसुकै शिक्षकलाई निमित्तमा जिम्मेवारी तोकेपछि अर्को व्यवस्था नभएसम्मका लागि उसैले विद्यालय प्रसाशन चलाउने शिक्षा ऐनमा व्यवस्था रहेकाले विद्यालयको आधिकारीक प्रधानाध्यापक आफु नै रहेको बताउनु भयो ।

विद्यालयका अर्का शिक्षक नन्दकिशोर रामले भने बरिष्ठताको  हिसाबले निवर्तमान प्रधानाध्यापक धुपनाथ साहपछि आफु नै सिनियर रहेकाले विद्यालयको निमित प्रधानाध्यापक आफु नै रहेको दाबी गर्नुहुन्छ ।

विद्यालयमा २ जना शिक्षकहरुले प्रधानाध्यापकमा आ–आफनो दाबी राखेपछि कसको निर्देशन मानेर अध्ययन अध्यापन गराउने हो भन्ने अन्यौलता रहेको शिक्षक मनोज यादवले बताउनु भयो । 

विद्यालयका शिक्षकहरुलाई कसको निर्देशन मान्ने भन्ने अन्यौल त छदैछ ।  दुई  जना प्रधानाध्यापकले दाबी गरेपछि विद्यार्थीहरु पनि अन्यौलमा परेका छन । कक्षा ९ मा अध्ययनरत देबेन्द्र चौहानले आफुहरुको कुनै समस्या पर्दा कुन प्रधानाध्यापक कहाँ जाने र कसलाई सुनाउने भन्ने अन्यौल रहेको बताउनु भयो  ।

मजाको कुरा त के छ भने प्राधानाध्यापकको दावी गर्ने दुबै जना शिक्षकहरु समस्या पर्दा भने जिम्मेवारी बाट पन्छिने गर्छन । “शिक्षकहरु कुनै दिन नआउदा दुबै प्रधानाध्यापकसंग गुनासो गर्दा वहाहरु जिम्मेवारीबाट पन्छिने गरेको चौहानले गुनसो गर्नु भयो  ।

कक्षा ९ मा अध्ययनरत छात्रा नितु कुमारीले बिद्यालयमा भएका समस्याहरुको समाधानकोलागि कोही जवाफदेह नरहेको बताउनु भयो । उहाँले भन्नु भयो“बिद्यालयमा शौचालय छैन जसले गर्दा छात्राहरुलाई समस्या छ तर गुनासो सुनाउने जिम्मेवार कोही मान्छे छैनन । 

विद्यालयको आधिकारीक निमित प्रधानाध्यापक को हो भन्ने सन्दर्भमा गाउपालिका अध्यक्ष विजय चौरसियाले अर्को प्रधानाध्यापक नआएसम्म बरिष्ठता र नियम अनुसार नन्दकिशोर रामलाई निमितको जिम्मेवारी तोकेको बताउनु भयो ।

विद्यालयको पठनपाठन प्रणाली अनुसार चलाउन गतिशिल प्रधानाध्यापक ल्याउन आफु प्रयासरत रहेको अध्यक्ष चौरसियाले बताउनु भयो ।